ჩვენ დაინტერესებული ვართ რუსეთთან ურთიერთობების განვითარებითა და ევრაზიულ ეკონომიკურ კავშირში მონაწილეობით - ფაშინიანი მიშუსტინთან შეხვედრაზე

სომხეთის რესპუბლიკის პრემიერ-მინისტრმა ნიკოლ ფაშინიანმა განაცხადა, რომ ერევანი დაინტერესებულია რუსეთის ფედერაციასთან ორმხრივი ურთიერთობების განვითარებით, ისევე როგორც ევრაზიულ ეკონომიკურ კავშირში მონაწილეობით.

„არმენპრესის“ ცნობით, ამის შესახებ სომხეთის მთავრობის მეთაურმა რუს კოლეგასთან, მიხეილ მიშუსტინთან ეკატერინბურგში გამართულ შეხვედრაზე განაცხადა.

„როგორც არჩევნებამდე (რედ. იგულისხმება სომხეთში 7 ივნისს გამართული საპარლამენტო არჩევნები), ისე არჩევნების შემდეგ, ჩვენ ერთგული ვართ რუსეთთან ჩვენი ურთიერთობების შემდგომი განვითარების კურსის“, - აღნიშნა ფაშინიანმა.

მან ასევე დასძინა, რომ ბოლო პერიოდში სომხეთსა და რუსეთს შორის გარკვეული პრობლემები წარმოიშვა და იმედი გამოთქვა, რომ მათი მოგვარება შესაძლებელი გახდება.

„ეს შეხვედრა ძალიან კარგი შესაძლებლობაა ჩვენი ურთიერთობების მთელი სპექტრის განსახილველად. ბოლო დროს გარკვეული პრობლემური საკითხები წამოიჭრა და, რა თქმა უნდა, იმედი მაქვს, რომ მათ განვიხილავთ და გადავჭრით. ჩვენ დაინტერესებული ვართ ევრაზიულ ეკონომიკურ კავშირში ჩვენი მონაწილეობით და იმით, რომ ეეკ-ის შესახებ ხელშეკრულებით გათვალისწინებულმა მექანიზმებმა გეგმურ რეჟიმში იმუშაოს“, - განაცხადა ფაშინიანმა.

პრემიერ-მინისტრმა გამოთქვა მოსაზრება, რომ ეს ასევე შედის თავად ევრაზიული ეკონომიკური კავშირის შემდგომი განვითარების ინტერესებშიც.

„როგორც აღვნიშნე, ჩვენ განწყობილი ვართ კონსტრუქციული მიდგომისკენ ყველა საკითხისა და ნიუანსის განხილვისა და გარკვევის პროცესში. იმედი მაქვს, დღევანდელი მოლაპარაკებების შედეგად კონკრეტული პრობლემების გადაჭრას შევძლებთ“, - ხაზგასმით აღნიშნა პრემიერმა ფაშინიანმა.

ნიკოლ ფაშინიანი ეკატერინბურგში მონაწილეობს საერთაშორისო სამრეწველო გამოფენა „ინოპრომ-2026“-ის ფარგლებში გამართულ პლენარულ სესიაზე, თემით - „ინდუსტრია 360: წარმოება საზღვრების გარეშე“.

აღსანიშნავია, რომ სომხეთში 7 ივნისს გამართული საპარლამენტო არჩევნების წინ, რუსეთმა მრავალი დასახელების სომხური პროდუქციის იმპორტზე შეზღუდვები და აკრძალვები დააწესა, რაც დღემდე ძალაში რჩება.