ევროკავშირი სომხეთს სავაჭრო ურთიერთობების გასამყარებლად და დივერსიფიკაციისთვის 18 მილიონ ევროს გამოუყოფს - ურსულა ფონ დერ ლაიენი
3 წუთი კითხვის
ევროკომისიის პრეზიდენტმა ურსულა ფონ დერ ლაიენმა ერევანში განაცხადა, რომ სომხეთი მალე მიიღებს 18 მილიონ ევროს, რაც ქვეყნის სავაჭრო კავშირების გაძლიერებასა და დივერსიფიკაციას მოხმარდება.
„არმენპრესის“ ცნობით, სომხეთის პრემიერ-მინისტრ ნიკოლ ფაშინიანთან ერთად გამართულ ერთობლივ პრესკონფერენციაზე მან აღნიშნა, რომ სომხეთი კვლავ დგას რუსეთის მხრიდან მნიშვნელოვანი ეკონომიკური ზეწოლის წინაშე, თუმცა შეუძლია დარწმუნებული იყოს, როდესაც ევროკავშირის პარტნიორებზე ზეწოლა იზრდება, ბრიუსელი მათ მხარდასაჭერად ქმედით ნაბიჯებს დგამს.
„ეს დაფინანსება, მაგალითად, დაეხმარება ქვეყანას ექსპორტის ხელშემწყობი სააგენტოს შექმნაში, რათა გაიზარდოს სომხური ბიზნესის საექსპორტო პოტენციალი. ეს 18 მილიონი ევრო არის იმ 52-მილიონიანი დახმარების პაკეტის საბოლოო ნაწილი, რომელიც ჩვენ ივნისის დასაწყისში, პრემიერ-მინისტრთან სატელეფონო საუბრისას განვიხილეთ. ამასთან, ჩვენ გადავდგამთ კიდევ ერთ ნაბიჯს, რომელიც ეხება ავტონომიური სავაჭრო ღონისძიებების (ATMs) ინიციირებას. ამის წყალობით, ევროკავშირში სომხური ექსპორტის 80% ლიბერალიზებული იქნება და გათავისუფლდება საბაჟო გადასახადებისგან. ამგვარად, ჩვენ შევძლებთ იმ საქონლის გადამისამართებას, რომელიც ამჟამად დიდწილად რუსულ ბაზარზეა დამოკიდებული. თქვენ შეძლებთ მათ გაგზავნას ევროპის ერთიან ბაზარზე, რომელსაც 450 მილიონი მომხმარებელი ჰყავს. ეს ბაზარი ღია იქნება, კერძოდ, სომხური ახალი სასოფლო-სამეურნეო პროდუქციის 99%-ისთვის, რომელიც აქამდე რუსეთში გადიოდა. ასევე, კარი გაეღება სომხური სასმელებისა და ალკოჰოლური პროდუქციის 90%-ზე მეტს“, - განაცხადა ევროკომისიის პრეზიდენტმა.
მან შეახსენა დამსწრეებს, რომ ბოლო თვეების განმავლობაში ევროპულ ბაზარზე სომხური ყვავილების იმპორტის მოცულობა საგრძნობლად გაიზარდა, რაც, ურსულა ფონ დერ ლაიენის თქმით, ორმხრივ ეკონომიკურ პარტნიორობაში ახალი ფურცლის გადაშლის მშვენიერი სიმბოლოა.
„ეს მხოლოდ დასაწყისია. ეს ახალი ზომები სწრაფი დივერსიფიკაციის შესაძლებლობას შექმნის. ივლისის შუა რიცხვებში ჩვენ სომხეთში ექსპერტებს გამოვგზავნით, რომლებიც უშუალოდ თქვენს მწარმოებლებთან, საწარმოებთან და ექსპორტიორებთან იმუშავებენ, რათა დაეხმარონ მათ ყველა იმ შესაძლებლობის ათვისებაში, რასაც ევროკავშირთან პრივილეგირებული პარტნიორობა სთავაზობთ“, - დასძინა ევროკომისიის პრეზიდენტმა.
ევროკომისიის პრეზიდენტი სომხეთს სამუშაო ვიზიტით დღეს, 2 ივლისს, დილით ეწვია. სომხეთის რესპუბლიკის პრემიერ-მინისტრმა ნიკოლ ფაშინიანმა მთავრობის ადმინისტრაციაში ევროკომისიის პრეზიდენტს უმასპინძლა.