2 წუთი კითხვის
სომხეთის პრემიერ-მინისტრმა ნიკოლ ფაშინიანმა მნიშვნელოვნად მიიჩნია ფაქტი, რომ სომხეთის უშიშროების საბჭოს მდივნის, არმენ გრიგორიანისა და აზერბაიჯანის პრეზიდენტის თანაშემწის საგარეო პოლიტიკის საკითხებში, ჰიქმეთ ჰაჯიევის ბოლო შეხვედრა სწორედ სომხეთში და არა რეგიონის მიღმა გაიმართა. „არმენპრესის“ ცნობით, ამის შესახებ ნიკოლ ფაშინიანმა ჟურნალისტებთან ბრიფინგზე განაცხადა.
„ეს ნიშნავს, რომ სამშვიდობო პროცესის მიმართულებით წინ მივიწევთ და ვმართავთ იმ რისკებს, რომლებიც შესაძლოა წარმოქმნილიყო“, - განაცხადა პრემიერ-მინისტრმა.
მან აღნიშნა, რომ შეხვედრისას სხვადასხვა საკითხი დაისვა, მათ შორის ტყვეობაში მყოფ პირებთან, ისევე როგორც სასაზღვრო სიტუაციის მართვასთან დაკავშირებული თემები.
„არმენ გრიგორიანს მე დავავალე, აზერბაიჯანელ კოლეგასთან ერთად განეხილა, არსებობდა თუ არა შეხვედრის საჭიროება. ჩვენ სიტუაციის მართვით ვართ დაკავებულნი“, - თქვა ფაშინიანმა და დასძინა, რომ მსოფლიოს ყველა ქვეყნის მოლაპარაკებები ერთმანეთთან ემსახურება პოზიციების, გეგმების, სტრატეგიებისა და აქტუალური საკითხების განხილვას.
სომხეთის უშიშროების საბჭოს მდივანი არმენ გრიგორიანი და აზერბაიჯანის პრეზიდენტის თანაშემწე საგარეო პოლიტიკის საკითხებში ჰიქმეთ ჰაჯიევი ერთმანეთს 14 ივნისს, დილიჯანში შეხვდნენ. მხარეებმა შეხვედრის შესახებ იდენტური შინაარსის განცხადებები გაავრცელეს, რომელთა თანახმადაც, მოლაპარაკებებზე განიხილეს აზერბაიჯან-სომხეთის სამშვიდობო დღის წესრიგთან დაკავშირებული საკითხები და ხაზი გაესვა ორმხრივი პირდაპირი დიალოგის გაგრძელების მნიშვნელობას.