ევროკავშირი სომხეთთან სავაჭრო კავშირების გასაუმჯობესებლად დაჩქარებული ღონისძიებების პაკეტს ამუშავებს

რუსეთის მიერ სომხეთიდან იმპორტზე დაწესებული შეზღუდვების ფონზე, ევროკომისია დაჩქარებული წესით ამზადებს ღონისძიებების პაკეტს სომხეთთან სავაჭრო ურთიერთობების გასაუმჯობესებლად.

„არმენპრესის“ ცნობით, ამის შესახებ Financial Times-ი 4 წყაროზე დაყრდნობით წერს.

აღინიშნება, რომ ბრიუსელი ამუშავებს სავაჭრო ღონისძიებებს, რომლებიც შეამცირებს სომხური კვების პროდუქტებისა და სასოფლო-სამეურნეო ნაწარმის ექსპორტის საბაჟო გადასახადებს.

ევროკომისიის სპიკერმა ოლოფ გილმა Financial Times-ს განუცხადა, რომ ევროკომისია შესთავაზებს სავაჭრო ღონისძიებებს, რათა ევროკავშირის ბაზარზე სომხური ბიზნესისთვის მეტი შესაძლებლობა გაჩნდეს, ასევე მხარი დაუჭიროს ეკონომიკის იმ სექტორებს, რომლებიც ყველაზე მეტად დაზარალდნენ რუსეთის ფედერაციის შეზღუდვების გამო.

„ახლა წინ სვლისა და მათი მხარდაჭერის დროა, რათა ვაჩვენოთ, რომ ჩვენ შეგვიძლია ვიყოთ საიმედო პარტნიორი“, - განაცხადა FT-ის ერთ-ერთმა წყარომ.

გავრცელებული ინფორმაციით, ღონისძიებები, რომლებიც ევროკავშირის წევრი სახელმწიფოების უმრავლესობისა და ევროპარლამენტის დამტკიცებას მოითხოვს, მოიცავს დაახლოებით 20 სასაქონლო კატეგორიის უდიდეს ნაწილს, რომელთა წლიური ღირებულება დაახლოებით 420 მილიონ ევროს შეადგენს.

მიუხედავად ამისა, წყაროების თანახმად, რამდენიმე სომხური პროდუქტი პრობლემურია ევროკავშირის ოფიციალური პირებისთვის. ეს ძირითადად ეხება კონიაკს, რომელიც სომხეთიდან ექსპორტირებული ერთ-ერთი მთავარი საქონელია, იტალიისა და საფრანგეთისთვის კონიაკის წარმოების მნიშვნელობის გათვალისწინებით.

სომხეთის ეკონომიკის მინისტრმა გევორგ პაპოიანმა განაცხადა, რომ სომხეთი „კონიაკის“ ნაცვლად გამოიყენებს დასახელებას „სომხური ბრენდი“.

პრობლემურია ასევე ზღვაზე გასასვლელის არმქონე ქვეყნიდან თურქეთის ან საქართველო ტერიტორიის გავლით მალფუჭებადი პროდუქტების ტრანსპორტირების სირთულე.

რუსეთმა სომხეთში 7 ივნისს გამართული საპარლამენტო არჩევნების წინ აკრძალვები და შეზღუდვები დააწესა მრავალი სომხური საქონლის იმპორტზე, რაც დღემდე გრძელდება.

რუსეთის მიერ სომხეთის მიმართ დაწესებული იმპორტის ამ აკრძალვების ფონზე, სომხეთი საექსპორტო ბაზრების დივერსიფიკაციას ახდენს ევროკავშირისა და სხვა ბაზრების მიმართულებით.