2 წუთი კითხვის
სომხეთის უშიშროების საბჭოს მდივნის, არმენ გრიგორიანის შეფასებით, სომხეთსა და ევროკავშირს შორის ურთიერთობები არასოდეს ყოფილა ისეთი მტკიცე, როგორც ახლაა.
„არმენპრესის“ ცნობით, ამის შესახებ არმენ გრიგორიანმა საერთაშორისო ფორუმის „ერევნის დიალოგის“ ფარგლებში გამართულ „ევროპა ძალაუფლებისა და უზენაესობის ახალ ფორმებს შორის: გეოპოლიტიკური აქტორები დანაწევრებულ სამყაროში“ პანელურ დისკუსიაზე განაცხადა.
„ბოლო რამდენიმე წლის განმავლობაში სომხეთ-ევროკავშირის ურთიერთობებმა უზარმაზარი ცვლილებები განიცადა. გავბედავდი მეთქვა, რომ სომხეთისა და ევროკავშირის ურთიერთობებში რევოლუციაც კი მოხდა. ჩვენ მუდმივად ვამბობთ, რომ სომხეთ-ევროკავშირის ურთიერთობები იმაზე მტკიცეა, ვიდრე ოდესმე, და ჩვენ გავაგრძელებთ ამ მიმართულებით მუშაობასა და ძალისხმევას“, - აღნიშნა გრიგორიანმა და დასძინა, რომ ამჟამად სომხეთს დაბალანსებული და დივერსიფიცირებული პოლიტიკა აქვს არჩეული.
მისი თქმით, ერთ-ერთი რევოლუციური ცვლილება ისაა, რომ ამ პერიოდში მოხერხდა რეგიონის, როგორც კონფლიქტის ზონის, აღქმის ტრანსფორმაცია უფრო მშვიდობიან აღქმად, რის შედეგადაც ევროკავშირმა მაღალ დონეზე მოუწოდა ინვესტორებს, ჩამოვიდნენ სომხეთში.
„ჩვენ გვაქვს იმედი და დარწმუნებულნი ვართ, რომ გავაგრძელებთ ამ მიმართულებით მუშაობას - პირველ რიგში, აზერბაიჯანთან მშვიდობის ინსტიტუციონალიზაციით და, ამავდროულად, რეგიონის სტაბილურობის „კუნძულად“ ქცევით“, - ხაზგასმით აღნიშნა გრიგორიანმა და დაამატა, რომ ამ გზაზე სომხეთი ევროკავშირს განიხილავს, როგორც ძალზე მნიშვნელოვან პარტნიორს.