ალიანსები კვლავაც მნიშვნელოვანია, მაგრამ ყურადღება საკუთარ შესაძლებლობებზე უნდა გამახვილდეს - სომხეთის უშიშროების საბჭოს მდივანი
2 წუთი კითხვის
სომხეთის უშიშროების საბჭოს მდივნის, არმენ გრიგორიანის რწმენით, გეოპოლიტიკა ამჟამად იცვლება და მსოფლიოს მრავალი ქვეყანა საკუთარი თავდაცვისუნარიანობის გაძლიერებაზე აკეთებს აქცენტს, მიუხედავად იმისა, რომ ალიანსები კვლავ მნიშვნელოვანი რჩება.
„არმენპრესის“ ცნობით, ამის შესახებ არმენ გრიგორიანმა საერთაშორისო ფორუმის „ერევნის დიალოგის“ ფარგლებში „ევროპა ძალაუფლებისა და სუვერენიტეტის ახალ გამოვლინებებს შორის“ გამართულ პანელურ დისკუსიაზე განაცხადა.
„არ ვიტყოდი, რომ ალიანსები არ მუშაობს. ალიანსები კვლავაც მნიშვნელოვანია, თუმცა ასევე მნიშვნელოვანია საკუთარ შესაძლებლობებზე ფოკუსირება“, - აღნიშნა გრიგორიანმა და ხაზი გაუსვა საკუთარი რესურსებისა და პარტნიორული ურთიერთობების როლს იმ გამოწვევების გადაჭრაში, რომელთა წინაშეც დღეს სახელმწიფოები დგანან.
მან აღნიშნა, რომ ბოლო რამდენიმე წლის განმავლობაში სომხეთმა დიდი ყურადღება დაუთმო დივერსიფიკაციას, რათა მაქსიმალურად ბევრი ალტერნატივა ჰქონოდა, რადგან გეოპოლიტიკაში მონოპოლიები ასევე წარმოადგენს გამოწვევას.
„ყოველთვის უნდა არსებობდეს ალტერნატივები. ეს არის თანამედროვე სამყაროს მთავარი გზავნილი“, - გამოთქვა რწმენა უშიშროების საბჭოს მდივანმა.
ამ კონტექსტში, გრიგორიანმა საინტერესო გარემოებად მიიჩნია ის, თუ როგორ შეიძლება მსოფლიო მშპ-ის 110 ტრილიონი დოლარი იყოს დამოკიდებული ერთ სრუტეზე, რამაც შესაძლოა ეჭვქვეშ დააყენოს ენერგეტიკული უსაფრთხოების მთელი კონცეფცია და აიძულოს მხარეები, გადახედონ მას და ალტერნატივა მოძებნონ.
გრიგორიანი, სავარაუდოდ, გულისხმობდა ჰორმუზის სრუტეს, სადაც გემების მიმოსვლა მკვეთრად შეიზღუდა ახლო აღმოსავლეთში კონფლიქტის გამწვავების შემდეგ, რამაც ენერგეტიკული რესურსების მიწოდების ჯაჭვების დარღვევა გამოიწვია.
სომხეთის უშიშროების საბჭოს მდივნის დაკვირვებით, თანამედროვე გეოპოლიტიკაში, საერთაშორისო ურთიერთობებსა თუ სახელმწიფოების წინაშე არსებულ გამოწვევებში რამის პროგნოზირება რთულია, თუმცა სომხეთისთვის ყველაზე მნიშვნელოვანია სახელმწიფოს საკმარისი შესაძლებლობები პრობლემების გადასაჭრელად.