2 წუთი კითხვის
სომხეთის დაკავშირებადობა მნიშვნელოვან როლს ასრულებს ევროპის მიწოდების ჯაჭვებისთვის. „არმენპრესის“ ცნობით, ამის შესახებ ევროკომისიის პრეზიდენტმა ურსულა ფონ დერ ლაიენმა სამიტზე მისვლისას ჟურნალისტებთან ბრიფინგზე განაცხადა.
ფონ დერ ლაიენმა ასევე გამოყო ის თემები, რომლებიც ერევანში ევროპული პოლიტიკური საზოგადოების მე-8 სამიტის ფარგლებში განიხილება. ესენია ევროპის დამოუკიდებლობა, კერძოდ ენერგეტიკული დამოუკიდებლობა, თავდაცვა და უსაფრთხოება, ასევე მიწოდების საიმედო ჯაჭვები.
ოფიციალურმა პირმა აღნიშნა, რომ ევროპა დიდწილად არის დამოკიდებული იმპორტირებულ წიაღისეულ საწვავზე. ამ დამოკიდებულების დასაძლევად მან ხაზი გაუსვა განახლებადი ენერგიისა და ბირთვული ენერგიის მნიშვნელობას.
„ჩვენ უნდა გავაფართოოთ ენერგიის წარმოების შესაძლებლობები ევროპაში. ეს მოიცავს განახლებადი ენერგიის წყაროებსა და ბირთვულ ენერგიას, რომლებიც საშუალებას გვაძლევს ვაწარმოოთ ენერგია შიგნით. ისინი უფრო იაფი და საიმედოა“, - განაცხადა მან.
ევროკომისიის პრეზიდენტმა ასევე მნიშვნელოვნად მიიჩნია თავდაცვისა და უსაფრთხოების საკითხები.
„ჩვენ უნდა გავაძლიეროთ ჩვენი სამხედრო შესაძლებლობები, რათა შევძლოთ საკუთარი თავის დაცვა“, - თქვა მან და დასძინა, რომ ამისთვის არსებობს საინვესტიციო სახსრები და ახლა საჭიროა სამხედრო შესაძლებლობების წარმოების პროცესის დაჩქარება.
განხილვის მესამე თემად ფონ დერ ლაიენმა მიწოდების საიმედო ჯაჭვები დაასახელა, რის მიზნითაც მყარდება კავშირი იმ ქვეყნებთან, რომლებთანაც მოქმედებს თავისუფალი ვაჭრობის შეთანხმებები. მან გამოყო ლათინური ამერიკა, ინდოეთი, ავსტრალია. სწორედ ამ კონტექსტში ახსენა მან სომხეთის მნიშვნელობა ევროპის მიწოდების ჯაჭვებისთვის.
მან აღნიშნა, რომ სომხეთი „მნიშვნელოვან“ როლს ასრულებს, განსაკუთრებით სამხრეთ კავკასიისა და ცენტრალური აზიის დაკავშირებადობის საკითხში.