2 წუთი კითხვის
საფრანგეთის პრეზიდენტი ემანუელ მაკრონი სახელმწიფო ვიზიტით ერევანში ჩავიდა.
„არმენპრესის“ ცნობით, ერევნის „ზვართნოცის“ აეროპორტში საფრანგეთის პრეზიდენტს სომხეთის რესპუბლიკის პრეზიდენტი ვაჰაგნ ხაჩატურიანი დახვდა.
საფრანგეთის პრეზიდენტი 4 მაისს ერევანში ევროპული პოლიტიკური საზოგადოების მე-8 სამიტში მიიღებს მონაწილეობას.
5 მაისს დაიწყება მისი სახელმწიფო ვიზიტი სომხეთში.გაიმართება სომხეთის პრემიერ-მინისტრ ნიკოლ ფაშინიანისა და საფრანგეთის პრეზიდენტის პირისპირ შეხვედრა, რასაც მოჰყვება ორი ქვეყნის ლიდერის გაფართოებული შემადგენლობით შეხვედრა. დოკუმენტების ხელმოწერის ცერემონიის შემდეგ ნიკოლ ფაშინიანი და ემანუელ მაკრონი მედიისთვის განცხადებებს გააკეთებენ.
პრეზიდენტი მაკრონი წიწერნაკაბერდის მემორიალურ კომპლექსში პატივს მიაგებს სომეხთა გენოციდის მსხვერპლთა ხსოვნას, ასევე ეწვევა მატენადარანს.
ასევე გაიმართება სომხეთის რესპუბლიკის პრეზიდენტის ვაჰაგნ ხაჩატურიანისა და საფრანგეთის პრეზიდენტის ემანუელ მაკრონის შეხვედრა.
სახელმწიფო ვიზიტის ფარგლებში, საფრანგეთის პრეზიდენტი სომხეთის პრემიერ-მინისტრის თანხლებით გიუმრის ეწვევა, სადაც პატივს მიაგებს 1988 წლის მიწისძვრის მსხვერპლთა ხსოვნას.
ნიკოლ ფაშინიანი და ემანუელ მაკრონი გიუმრიში დაესწრებიან კონცერტს სახელწოდებით „მუსიკალური ხიდი: სომხეთი-საფრანგეთი“.