სომხეთის სშკ-ის თავმჯდომარემ და საქართველოს შემოსავლების სამსახურის უფროსმა სამუშაო შეხვედრა გამართეს

გოგავანის სასაზღვრო გამშვებ პუნქტზე სომხეთის რესპუბლიკის სახელმწიფო შემოსავლების კომიტეტის თავმჯდომარე ედუარდ ჰაკობიანისა და საქართველოს შემოსავლების სამსახურის უფროსის ირაკლი ბერაიას შეხვედრა გაიმართა.

როგორც „არმენპრესი“ სომხეთის სახელმწიფო შემოსავლების კომიტეტის (სსშკ) მიერ გავრცელებულ განცხადებაზე დაყრდნობით იტყობინება, ედუარდ ჰაკობიანმა აღნიშნა, რომ შეხვედრა სიმბოლურია, რადგან ის იმ ადგილას ტარდება, სადაც სომხურ-ქართული მეგობრობა კიდევ უფრო ღრმავდება და თანამშრომლობის ახალი ეტაპის საწყისად იქცევა. მისი თქმით, ორ ქვეყანას შორის ჩამოყალიბებულმა მრავალწლიანმა პარტნიორობამ მყარი საფუძველი შექმნა ეფექტური ურთიერთქმედებისთვის, ხოლო შემუშავებული დღის წესრიგი უკვე რეალურ გავლენას ახდენს ქვეყნებისა და მთელი რეგიონის განვითარებაზე.

სომხეთის სსშკ-ის თავმჯდომარემ ასევე ხაზგასმით აღნიშნა, რომ საქართველოსთან სავაჭრო ბრუნვას სტრატეგიული მნიშვნელობა აქვს და ამჟამად კიდევ უფრო აქტუალური ხდება, იმის გათვალისწინებით, რომ კავკასია თანდათან ყალიბდება საერთაშორისო სავაჭრო დერეფნად. ამ კონტექსტში, მისი შეფასებით, განსაკუთრებული მნიშვნელობა ენიჭება ორი ქვეყნის საბაჟო სამსახურების მჭიდრო თანამშრომლობას.

მისასალმებელი სიტყვით ასევე გამოვიდა საქართველოს შემოსავლების სამსახურის უფროსი ირაკლი ბერაია. მან აღნიშნა, რომ დიდი პატივია სომეხ კოლეგებთან შეხვედრა და ორმხრივ ვაჭრობასა და საბაჟო სფეროსთან დაკავშირებული საკითხების განხილვა.

შეხვედრის განმავლობაში განსაკუთრებული ყურადღება დაეთმო ერთობლივ ინიციატივებს, კერძოდ, სასაზღვრო გამშვები პუნქტების მოდერნიზაციასა და სასაზღვრო გამშვებ პუნქტებზე ერთობლივი კონტროლის მოდელის დანერგვაზე მუშაობას. მხარეებმა გამოთქვეს რწმენა, რომ ეს შეხვედრა პარტნიორული ურთიერთობების შემდგომი გაღრმავების ახალი იმპულსი გახდება.

მხარეებმა ასევე განიხილეს სატვირთო სატრანსპორტო საშუალებების მიმართ ელექტრონული საკეტების გამოყენების, წინასწარი ელექტრონული მონაცემების გაცვლის სისტემის განვითარებისა და ავტორიზებული ეკონომიკური ოპერატორების პროგრამების ურთიერთაღიარების საკითხები.

სომხურმა მხარემ დაადასტურა მზადყოფნა, ქართველ კოლეგებთან ერთად გააგრძელოს აქტიური თანამშრომლობა არსებული დაბრკოლებების გადალახვისა და ინიციატივების ეფექტური განხორციელების მიზნით. შეხვედრის დასასრულს მხარეებმა კიდევ ერთხელ დაადასტურეს თანამშრომლობის უწყვეტობისა და მისი ურთიერთხელსაყრელი განვითარების მნიშვნელობა.