ტრამპი ირანთან ომის შესახებ მოსახლეობას მიმართავს

ამერიკის შეერთებული შტატების პრეზიდენტი დონალდ ტრამპი, 1 აპრილს, ირანის წინააღმდეგ მიმდინარე ომთან დაკავშირებით მნიშვნელოვან განცხადებას გააკეთებს. „არმენპრესის“ ცნობით, ამის შესახებ თეთრი სახლის პრესსპიკერმა, კეროლაინ ლივიტმა სოციალურ ქსელ X-ის საკუთარ გვერდზე განაცხადა.

„ხვალ (რედ. 1 აპრილს) საღამოს, 21:00 საათზე, პრეზიდენტი ტრამპი მოსახლეობას მიმართავს, რათა ირანთან დაკავშირებით მნიშვნელოვანი სიახლეები აცნობოს“, - დაწერა პრესსპიკერმა სხვა დეტალების დაზუსტების გარეშე.

პრეზიდენტმა ტრამპმა 31 მარტს განაცხადა, რომ აშშ-მა შესაძლოა ირანზე სამხედრო თავდასხმები მომდევნო ორ-სამ კვირაში შეწყვიტოს.

აშშ-მა და ისრაელმა ირანის წინააღმდეგ შეტევა 28 თებერვალს დაიწყეს; ისინი თეირანს სარაკეტო და ბირთვული პროგრამების განვითარებაში ადანაშაულებდნენ. ირანმა უარყო ბრალდებები და საპასუხო დარტყმები მიაყენა როგორც ისრაელს, ისე რეგიონში არსებულ ამერიკულ სამხედრო ბაზებს. დარტყმების შედეგად დაზარალდნენ ქუვეითი, ყატარი, არაბთა გაერთიანებული საამიროები, საუდის არაბეთი, ომანი, ბაჰრეინი და ერაყი.