3 წუთი კითხვის
სომხეთის საგარეო საქმეთა მინისტრი არარატ მირზოიანი ირწმუნება, რომ TRIPP-ის პროექტის გარშემო სომხეთისა და ამერიკის შეერთებული შტატების მოლაპარაკებები არ შენელებულა, მიუხედავად ირანში აშშ-ის მიერ მიმდინარე სამხედრო მოქმედებებისა და ახლო აღმოსავლეთში არსებული დაძაბული ვითარებისა.
„არმენპრესის“ ცნობით, არარატ მირზოიანმა ამის შესახებ ეროვნულ ასამბლეაში ჟურნალისტებთან ბრიფინგის დროს განაცხადა. მან უპასუხა კითხვას, შეჩერებულია თუ არა მოლაპარაკებები აშშ-თან TRIPP-ის შესახებ და აქვთ თუ არა სომხეთის ხელისუფლებას შიში, რომ ახლო აღმოსავლეთში დაძაბულობის შენარჩუნების შემთხვევაში პროექტი შესაძლოა ვერ განხორციელდეს.
„გარწმუნებთ, რომ სომხეთ-აშშ-ის მოლაპარაკებები TRIPP-ის გარშემო არ შენელებულა და ნორმალურ რეჟიმში მიმდინარეობს. პირველი ნაბიჯი 8 აგვისტოს გამოცხადდა, მეორე ნაბიჯზე ვიმოლაპარაკეთ და 14 იანვარს განხორციელების ჩარჩოს შესახებ ვრცელი დოკუმენტი შევათანხმეთ და გამოვაქვეყნეთ. შემდეგი ნაბიჯი უნდა იყოს მთავრობათაშორისი შეთანხმების დადება, სადაც უფრო მეტი სამართლებრივი მექანიზმი იქნება გათვალისწინებული. TRIPP-ის გარშემო მუშაობა ამჟამად დოკუმენტზე მუშაობას გულისხმობს და ეს პროცესი გრძელდება. როდესაც შესაძლებელი იქნება, მივაღწევთ უშუალოდ ადგილზე სამუშაოების განხორციელების ეტაპსაც“, - განაცხადა მირზოიანმა.
კითხვაზე, ხედავს თუ არა საფრთხეს ირანის ირგვლივ და ახლო აღმოსავლეთში დაძაბულობის ფონზე, რომ TRIPP შესაძლოა გამოყენებულ იქნას სხვა, კერძოდ, სამხედრო მიზნებისთვის, მირზოიანმა უპასუხა:
„ჩვენ ვსაუბრობთ წმინდა სატრანსპორტო და ექსკლუზიურად დაკავშირებადობის პროექტზე, რომელიც შექმნის ეკონომიკურ შესაძლებლობებს სომხეთისთვის, აზერბაიჯანისთვის, ყველა მეზობლისთვის, მათ შორის ირანისთვის. ირანელმა ოფიციალურმა პირებმა ჩვენი შეხვედრების დროს, თუ არ ვცდები, საჯაროდაც რამდენჯერმე განაცხადეს, რომ სომხეთის წარმომადგენლებმა მათ ინფორმაცია მიაწოდეს, მათ არ აქვთ შეშფოთება და მეტიც - მათთვისაც იქმნება ახალი შესაძლებლობები“.
ჟურნალისტის რეპლიკაზე, რომ არსებობს შიში, თითქოს აშშ-მა შესაძლოა TRIPP-ში თავისი წილი რომელიმე მესამე ქვეყანას, მაგალითად თურქეთს მიჰყიდოს, მირზოიანმა უპასუხა:
„საჭიროა დოკუმენტის წაკითხვა. ეს საკითხი გაწერილია TRIPP-ის განხორციელების ჩარჩო დოკუმენტში. იქ გათვალისწინებულია მექანიზმები, რომ სომხეთის თანხმობის გარეშე წილის რაიმე ფორმით გადაცემა, გაყიდვა თუ დათმობა შეუძლებელია“.