სომხეთი და აშშ მზად არიან ხელი მოაწერონ შეთანხმებას ბირთვული ენერგიის მშვიდობიანი გამოყენების სფეროში

სომხეთის საგარეო საქმეთა მინისტრმა არარატ მირზოიანმა პარიზში შეხვედრა გამართა აშშ-ის სახელმწიფო მდივნის მოადგილესთან შეიარაღების კონტროლისა და საერთაშორისო უსაფრთხოების საკითხებში, თომას დინანოსთან.

„არმენპრესის“ ცნობით, ამის შესახებ ინფორმაციას სომხეთის საგარეო საქმეთა სამინისტრო ავრცელებს.

მოსაუბრეებმა სხვადასხვა მიმართულებით სომხეთ-აშშ-ის სტრატეგიული პარტნიორობის გაღრმავების საკითხები განიხილეს.

არარატ მირზოიანმა და თომას დინანომ კმაყოფილება გამოთქვეს სომხეთისა და აშშ-ის მთავრობებს შორის ბირთვული ენერგიის მშვიდობიანი მიზნებისთვის გამოყენების სფეროში თანამშრომლობის შესახებ შეთანხმებაზე მოლაპარაკებების დასრულების გამო. მათ ხაზი გაუსვეს მზადყოფნას შესაბამისი ფორმატით შეთანხმების ხელმოწერისა და ამ სფეროში შემდგომი ურთიერთქმედებისთვის.

საუბარი შეეხო რეგიონულ ინფრასტრუქტურულ პროექტებს.

აზრები გაცვალეს ორმხრივად საინტერესო სხვა საკითხებზეც.