სომხეთისა და საფრანგეთის საგარეო საქმეთა მინისტრებმა ახლო აღმოსავლეთში არსებული ვითარება განიხილეს

სომხეთის საგარეო საქმეთა მინისტრმა არარატ მირზოიანმა პარიზში შეხვედრა გამართა საფრანგეთის ევროპისა და საგარეო საქმეთა მინისტრ ჟან-ნოელ ბაროსთან.

„არმენპრესის“ ცნობით, ამის შესახებ ინფორმაციას სომხეთის საგარეო საქმეთა სამინისტრო ავრცელებს.

მოსაუბრეებმა განიხილეს სომხეთსა და საფრანგეთს შორის სტრატეგიული პარტნიორობის თანმიმდევრული განვითარების კუთხით მიმდინარე სამუშაოები. საუბარი შეეხო თანამშრომლობის პროგრამებს საკვანძო სფეროებში, მათ შორის ენერგეტიკასა და ინფრასტრუქტურაში.

მინისტრებმა განიხილეს სამომავლო მაღალი დონის ღონისძიებები, მათ შორის მაისში ერევანში დაგეგმილი ევროპული პოლიტიკური გაერთიანების სამიტისთვის მოსამზადებელი სამუშაოები. ხაზი გაესვა უწყვეტ ურთიერთქმედებას დემოკრატიული მდგრადობის განმტკიცების მიმართულებით არსებული ტენდენციების პირობებში.

არარატ მირზოიანმა და ჟან-ნოელ ბარომ აზრები გაცვალეს ახლო აღმოსავლეთში მიმდინარე პროცესების შესახებ. მინისტრმა მირზოიანმა ხაზი გაუსვა ვითარების განმუხტვისა და რეგიონული სტაბილურობის უზრუნველყოფის მნიშვნელობას.