სომხეთისა და იტალიის საგარეო საქმეთა მოადგილეებმა ორმხრივი ურთიერთობების განვითარების და განმტკიცებისკენ მიმართული ნაბიჯები განიხილეს

სომხეთის რესპუბლიკისა და იტალიის რესპუბლიკის საგარეო საქმეთა სამინისტროებს შორის რომში გაიმართა მორიგი პოლიტიკური კონსულტაციები, სომხეთის საგარეო საქმეთა მინისტრის მოადგილის ვაჰან კოსტანიანისა და იტალიის საგარეო საქმეთა და საერთაშორისო თანამშრომლობის მინისტრის მოადგილის ედმონდო ჩირიელის ხელმძღვანელობით․

„არმენპრესის“ ინფორმაციით, ამის შესახებ სომხეთის საგარეო საქმეთა სამინისტრო იუწყება.

აღინიშნა, რომ კონსულტაციების ფარგლებში მხარეებმა განიხილეს ბოლო წლებში ორმხრივი ურთიერთობების პოზიტიური დინამიკა, განსაკუთრებული აქცენტით მაღალი დონის კონტაქტების მნიშვნელოვან როლზე კონსტრუქციული პოლიტიკური დიალოგის ხელშეწყობის, ასევე ეკონომიკური თანამშრომლობის შემდგომი გაძლიერებისა და გაფართოების საქმეში.

„განხილვის საგანი გახდა ორმხრივი დღის წესრიგის საკითხების ფართო სპექტრი. მხარეებმა ხაზი გაუსვეს ერთობლივი ნაბიჯების მნიშვნელობას, მათ შორის ორმხრივი ვაჭრობის ზრდის, ინვესტიციების წახალისების, მაღალტექნოლოგიური სექტორის, ტურიზმის, განათლების, კულტურისა და სხვა სფეროებში თანამშრომლობის განვითარების მიზნით“, - აღნიშნულია განცხადებაში.

საგარეო საქმეთა სამინისტროს ინფორმაციით, მხარეებმა ასევე განიხილეს სომხეთ–ევროკავშირის პარტნიორობის სტრატეგიული დღის წესრიგის საკითხები, აგრეთვე 2026 წელს სომხეთში დაგეგმილი ევროპის პოლიტიკური თანამეგობრობის მე-8 სამიტისა და ბიომრავალფეროვნების კონვენციის მხარეთა მე-17 კონფერენციის (COP17) მოსამზადებელი სამუშაოები.

აღნიშნულია, რომ მინისტრის მოადგილე ვაჰან კოსტანიანმა წარმოადგინა სამხრეთ კავკასიაში 2025 წლის 8 აგვისტოს შემდეგ განვითარებული მოვლენები. სხვა საკითხებთან ერთად, სომხეთის საგარეო საქმეთა მინისტრის მოადგილემ შეეხო მიმდინარე წლის 13 იანვარს სომხეთის საგარეო საქმეთა მინისტრ არარატ მირზოიანსა და აშშ-ის სახელმწიფო მდივან მარკო რუბიოს შორის გამართული შეხვედრის ფარგლებში „ტრამპის მარშრუტი საერთაშორისო მშვიდობისა და კეთილდღეობისათვის“ (TRIPP) პროექტის სომხეთ–აშშ-ის განხორციელების ჩარჩოს მიღებას.