სომხეთისა და თურქეთის დიპლომატიური, სპეციალური და სამსახურებრივი პასპორტების მფლობელებისთვის ვიზების გაცემის პროცესი 1 იანვრიდან გამარტივდება

სომხეთ–თურქეთის ურთიერთობების ნორმალიზაციის პროცესის სპეციალურ წარმომადგენლებს შორის მიღწეული შეთანხმებების ფარგლებში, სომხეთმა და თურქეთმა გადაწყვიტეს დიპლომატიური, სპეციალური და სამსახურებრივი პასპორტების მფლობელებისთვის ვიზების გაცემის პროცედურის გამარტივება․

„არმენპრესის“ ინფორმაციით, ამის შესახებ განცხადება გაავრცელა სომხეთის რესპუბლიკის საგარეო საქმეთა სამინისტრომ, სადაც აღნიშნულია, რომ 2026 წლის 1 იანვრიდან ორივე ქვეყნის დიპლომატიური, სამსახურებრივი და სპეციალური პასპორტების მფლობელებს შეეძლებათ ელექტრონული ვიზის (e-visa) მიღება უფასოდ.

„ამასთან დაკავშირებით სომხეთი და თურქეთი კიდევ ერთხელ ადასტურებენ თავიანთ მზადყოფნას, გააგრძელონ ორ ქვეყანას შორის ნორმალიზაციის პროცესი, სრული ნორმალიზაციის მიღწევის მიზნით ყოველგვარი წინაპირობების გარეშე“, - ნათქვამია სამინისტროს განცხადებაში.