სომხეთი არ ხედავს თურქეთთან საზღვრების გახსნის შეფერხების რაიმე მიზეზს։ რუბენ რუბინიანი

სომხეთი არ ხედავს მიზეზს, თუ რატომ უნდა შეაფერხოს თურქეთმა საზღვრების გახსნისა და სომხეთთან დიპლომატიური ურთიერთობების დამყარების პროცესი.

„არმენპრესის“ ინფორმაციით, ამის შესახებ ჟურნალისტებთან ბრიფინგზე განაცხადა სომხეთ–თურქეთის ურთიერთობების დარეგულირების პროცესში სომხეთის სპეციალურმა წარმომადგენელმა, ეროვნული ასამბლეის ვიცე-თავმჯდომარემ რუბენ რუბინიანმა.

„მე ვერ ვხედავ მიზეზს, თუ რატომ უნდა დააყოვნოს თურქეთმა ამ საკითხში. ყოველ შემთხვევაში, სომხური მხრიდან არანაირი შეფერხების პრობლემა არ არსებობს. ჩვენ მზად ვართ, უკვე ხვალვე გვქონდეს ღია საზღვრები და დამყარებული დიპლომატიური ურთიერთობები. სხვათა შორის, სულ ახლახან პაკისტანთან დავამყარეთ დიპლომატიური ურთიერთობები, რაც ასევე ძალიან მნიშვნელოვანი მოვლენაა. იმედი მაქვს, თურქეთთანაც მსგავს ნაბიჯს გადავდგამთ“, – აღნიშნა რუბინიანმა.

მისი თქმით, პოლიტიკური ნების არსებობის შემთხვევაში პროცესი ძალიან სწრაფად შეიძლება განხორციელდეს.

„ჩვენი მხრიდან ეს ნება ერთმნიშვნელოვნად არსებობს და დარწმუნებული ვარ, რომ მოკლე დროში შესაძლებელია დიდი შედეგების მიღწევა“, – დაამატა რუბინიანმა.

რუბინიანმა აღნიშნა, რომ სომხეთი თურქეთთან ურთიერთობების დარეგულირების პროცესს წინაპირობების გარეშე აგრძელებს.

„ჩვენ მრავალჯერ განვაცხადეთ, რომ პროცესი მიმდინარეობს წინაპირობების გარეშე. ჩვენც ჩვენი მხრიდან არ გვაქვს რაიმე წინაპირობა და ვფიქრობთ, რომ ძალიან სწრაფად შეიძლება გვქონდეს ღია საზღვარი და დამყარებული დიპლომატიური ურთიერთობები. ამ მიმართულებით ვიმუშავებთ“, – დაასკვნა რუბინიანმა.