ნატო-მ უკრაინა ჰააგის სამიტზე მოიწვია

ნატო-ს გენერალურმა მდივანმა მარკ რუტემ უკრაინა ჰააგაში ნატო-ს სამიტზე მოიწვია. „არმენპრესის“ ინფორმაციით, ამის შესახებ რუტემ განაცხადა ნატო-ს წევრი ქვეყნების თავდაცვის მინისტრების 5 ივნისს დაგეგმილი შეხვედრის წინ გამართულ პრესკონფერენციაზე, რომლის ვიდეოჩანაწერი გაავრცელა Times Radio-მ.

„მე უკრაინა სამიტზე მოვიწვიე“, - განაცხადა რუტემ, თუმცა არ უპასუხა კითხვას, იქნება თუ არა უკრაინა ნახსენები სამიტის საბოლოო განცხადებაში, თუმცა ხაზგასმით აღნიშნა, რომ ეს თემა განხილული იქნება.

რუტემ ასევე განაცხადა, რომ უკრაინის თავდაცვის მინისტრი დაესწრება 4 ივნისს უკრაინის თავდაცვის საკონტაქტო ჯგუფის თავდაცვის მინისტრების შეხვედრას. გარდა ამისა, 5 ივნისს, რუტეს თქმით, გაიმართება ნატო-უკრაინის საბჭოს სხდომა.

რუტემ ასევე აღნიშნა, რომ ჩრდილოატლანტიკურ ალიანსში გაწევრიანების უკრაინის შეუქცევადი გზა კვლავ ძალაშია, თუმცა მათ კიევისათვის „არასოდეს დაუპირებიათ ნატო-ში შესაძლო გაწევრიანება მშვიდობის ან ზავის შეთანხმების ნაწილად“.

ნატო-ს გენერალურმა მდივანმა აღნიშნა, რომ მოკავშირეებმა უკრაინას წელს 20 მილიარდი ევროს სამხედრო დახმარება დაჰპირდნენ და მომავალში გამოცხადდება მეტი დახმარება.