ნიკოლ ფაშინიანმა და მიხეილ ყაველაშვილმა განიხილეს სომხეთ-საქართველოს თანამშრომლობის თანმიმდევრული განვითარების საკითხები

სომხეთის რესპუბლიკის პრემიერ-მინისტრმა ნიკოლ ფაშინიანმა მთავრობის ადმინისტრაციაში მიიღო ოფიციალური ვიზიტით სომხეთში მყოფი საქართველოს პრეზიდენტის მიხეილ ყაველაშვილის ხელმძღვანელობით ჩამოსული დელეგაცია.

როგორც „არმენპრესი“ იუწყება, სომხეთის პრემიერ-მინისტრის ადმინისტრაციის მიერ გავრცელებული ინფორმაციის თანახმად, ნიკოლ ფაშინიანმა მიესალმა საქართველოს პრეზიდენტის ხელმძღვანელობით დელეგაციის ოფიციალურ ვიზიტს სომხეთში და კიდევ ერთხელ მიულოცა მიხეილ ყაველაშვილს მეგობარი საქართველოს პრეზიდენტად არჩევა. პრემიერ-მინისტრმა მას წარმატებები უსურვა ამ საპასუხისმგებლო პოსტზე მეგობარი საქართველოს, ორმხრივი ურთიერთობების და რეგიონის კეთილდღეობისთვის.

„თქვენ იცით, რამდენად დიდ მნიშვნელობას ვანიჭებთ ჩვენ საქართველოსთან ორმხრივ ურთიერთობებს, უკვე სტრატეგიული პარტნიორობის დონემდე მიგვიყვანია ჩვენი კავშირები. მიგვაჩნია, რომ ეს ნაბიჯი ასახავს ჩვენს გრძელვადიან მიზნებს. ყოველთვის ვამბობდი და კვლავაც მჯერა, რომ საქართველოსა და სომხეთს აქვთ საერთო ინტერესები და სწორედ ამ ინტერესებზე დაყრდნობით უნდა ავაშენოთ ჩვენი ურთიერთობები“, - განაცხადა ნიკოლ ფაშინიანმა და დასძინა, რომ მისი რწმენით, ეს ინტერესები თავსებადია სამხრეთ კავკასიის გრძელვადიანი განვითარების ინტერესებთანაც.

მიხეილ ყაველაშვილმა მადლობა გადაუხადა თბილი მიღებისთვის და აღნიშნა, რომ მისთვის დიდი პატივია პირველად სტუმრობა მეზობელ ქვეყანაში საქართველოს პრეზიდენტის რანგში. „ჩემთვის დიდი პატივია, რადგან ჩვენი ხალხები საუკუნეებია, რაც გვერდი-გვერდ ცხოვრობენ, ჩვენი მეგობრობა 3000 წელზე მეტს ითვლის და მთელ მსოფლიოში მისაბაძია. ამაზე ვესაუბრე სომხეთის პრეზიდენტსაც და ნამდვილად უნიკალურია, რომ დღეს ჩვენი ერების თანაცხოვრება გრძელდება. ცხადია, ჩვენი ურთიერთობები უნდა გაღრმავდეს და განვითარდეს, გასულ წელს გაფორმდა სტრატეგიული შეთანხმება“, - განაცხადა საქართველოს პრეზიდენტმა და დასძინა, რომ ყველაფერი უნდა გაკეთდეს იმისათვის, რომ სამხრეთ კავკასია ძლიერი რეგიონი გახდეს. მიხეილ ყაველაშვილმა მიესალმა იმასაც, რომ სომხეთსა და აზერბაიჯანს შორის მშვიდობის შეთანხმება შეთანხმებულია და იმედი გამოთქვა, რომ ის მალე გაფორმდება და რეგიონში დამკვიდრდება მდგრადი მშვიდობა და სტაბილურობა.

მხარეებმა განიხილეს სომხეთ-საქართველოს თანამშრომლობის დღის წესრიგის სხვადასხვა საკითხი, მათ შორის ეკონომიკის, ტურიზმის, ინფრასტრუქტურის, განათლებისა და სხვა სფეროებში ერთობლივი პროექტები. მათ მაღალი შეფასება მისცეს მაღალი დონის ორმხრივი ვიზიტების ინტენსივობას და აღნიშნეს, რომ აქტიური დიალოგი ახალ იმპულსს აძლევს თანამშრომლობის გაღრმავებას ყველა მიმართულებით.

მხარეები ასევე შეეხნენ რეგიონში მიმდინარე პროცესებს. ორივე მხარემ ხაზი გაუსვა სომხეთსა და აზერბაიჯანს შორის სამშვიდობო შეთანხმების ხელმოწერის მნიშვნელობას რეგიონში გრძელვადიანი მშვიდობის უზრუნველყოფის მიზნით.