სომხეთ-აზერბაიჯანის საზღვარზე მდგომარეობა შედარებით სტაბილურია։ თავდაცვის მინისტრის მოადგილე

სომხეთსა და აზერბაიჯანს შორის საზღვარზე მდგომარეობა შედარებით სტაბილურია.

„არმენპრესის“ ინფორმაციით, ამის შესახებ ჟურნალისტებთან საუბარში სომხეთის რესპუბლიკის ეროვნული ასამბლეის შენობაში სომხეთის თავდაცვის მინისტრის მოადგილემ არმან სარგსიანმა განაცხადა.

„ამ ეტაპზე ფრონტის ხაზზე მდგომარეობა შედარებით სტაბილურია․ ხანდახან, როდესაც მოწინააღმდეგის მხრიდან ხდება გასროლა, ეს არამიზნობრივი გასროლებია. ასევე შემიძლია ვთქვა, რომ ასეთი შემთხვევები იშვიათია“, – აღნიშნა სარგსიანმა.

მან ასევე დაამატა, რომ ამ ეტაპზე საზღვარზე აზერბაიჯანული ჯარების კონცენტრაცია არ შეინიშნება, თუმცა, თუ მსგავსი პრობლემა წარმოიშვება, თავდაცვის სამინისტრო უსაფრთხოების და ორგანიზაციულ ღონისძიებებს გაატარებს.

არმან სარგსიანმა აღნიშნა, რომ სომხეთის შეიარაღებული ძალები ასრულებენ თავიანთ საქმიანობას დაკისრებული უფლებამოსილებისა და ვალდებულებების ფარგლებში.

„პრიორიტეტული ამოცანაა უსაფრთხოების უზრუნველყოფა და მინდა გავიმეორო, რომ ამ ეტაპზე ფრონტის ხაზზე მდგომარეობა შედარებით სტაბილურია. ნებისმიერი პრობლემის შემთხვევაში ჩვენ დაუყოვნებლივ მივაწვდით ინფორმაციას საზოგადოებას“, – დაასრულა სომხეთის თავდაცვის მინისტრის მოადგილემ.