2 წუთი კითხვის
აშშ-ში სომხეთის საელჩოში პრემიერ-მინისტრ ნიკოლ ფაშინიანს შეხვედრა ჰქონდა ეკლესიათა მსოფლიო საბჭოსა და ვატიკანს შორის კომისიის თავმჯდომარე არქიეპისკოპოს ვიგენ აიკაზიანთან და ვაშინგტონის წმინდა ღვთისმშობლის ეკლესიის სულიერ მწყემსთან, მამა ჰოვსეფ კარაპეტიანთან.
როგორც „არმენპრესი“ პრემიერ-მინისტრის აპარატის განცხადებაზე დაყრდნობით იტყობინება, შეხვედრაზე განხილულ იქნა დიასპორაში სომხური იდენტობის შენარჩუნებისა და არსებული გამოწვევების საკითხები. პრემიერმინისტრმა ფაშინიანმა ხაზი გაუსვა ენისა და კულტურის შენარჩუნებისკენ მიმართულ კონსისტენტური ნაბიჯების მნიშვნელობას და სახელმწიფო მხარდაჭერის აუცილებლობას.
შეხვედრაზე გაცვალეს მოსაზრებები სომხეთი-დიასპორის კავშირების გაძლიერების მიზნით გადადგმულ ნაბიჯებზე.
შემდგომში, ნიკოლ ფაშინიანმა შეხვედრა გამართა „Nahigian Strategies“-ის პრეზიდენტ კით ნაჰიგიანთან. განხილულ იქნა სომხეთ-აშშ ურთიერთობების განვითარებასთან დაკავშირებული საკითხები.
განსაკუთრებული ყურადღება დაეთმო სომხეთის მთავრობის პრიორიტეტებსა და არსებულ გამოწვევებთან გამკლავებისკენ გადადგმულ ნაბიჯებს. ამ კონტექსტში, ბალანსირებული პოლიტიკის გატარების მნიშვნელობა განსაკუთრებით აღინიშნა.
პრემიერ-მინისტრ ნიკოლ ფაშინიანს ასევე შეხვედრა ჰქონდა ამერიკის სომხური ასამბლეის ხელმძღვანელობასთან. შეხვედრაზე განიხილეს ასამბლეის საქმიანობა, სომხეთ-აშშ ურთიერთობების თანმიმდევრული განვითარებისა და გაღრმავების საკითხები.
ფაშინიანმა აღნიშნა, რომ აშშ-სთან ხელმოწერილი სტრატეგიული პარტნიორობის დოკუმენტი ახალ შესაძლებლობებს ხსნის ორმხრივი ურთიერთობების გაძლიერებისთვის და იმედი გამოთქვა, რომ ასამბლეა გააგრძელებს ძალისხმევას სხვადასხვა სფეროში კავშირების განვითარებისთვის.
შეხვედრაზე ასევე იმსჯელეს „რეალური სომხეთის“ იდეაზე, ასევე რეგიონში მშვიდობისა და სტაბილურობის უზრუნველყოფის საკითხებზე.