სომხეთის უსაფრთხოების საბჭოს მდივანი აზერბაიჯანიდან გაკეთებულ განცხადებებს შემაშფოთებლად მიიჩნევს
2 წუთი კითხვის
სომხეთის უსაფრთხოების საბჭოს მდივანმა არმენ გრიგორიანმა შემაშფოთებლად შეაფასა აზერბაიჯანის მხრიდან სომხეთის მიმართ გაკეთებული აგრესიული განცხადებები.
ამის შესახებ არმენ გრიგორიანმა აღნიშნა 23 იანვარს ჟურნალისტებთან შეხვედრისას.
„გარდა ამისა, ჩვენ ვხედავთ ინტენსიურ ფრენებს სხვა ქვეყნებიდან, რომლებიც, დიდი ალბათობით, სამხედრო ტექნიკას აწვდიან ბაქოს. თუმცა მინდა აღვნიშნო, რომ ბოლო წლებში სხვადასხვა მიმართულებით ვმუშაობდით, რათა რეგიონში მაქსიმალური სტაბილურობა შეგვექმნა: ევროკავშირის სადამკვირვებლო მისიის ყოფნა სომხეთში, რომელიც, იმედი გვაქვს, მალე გაგრძელდება; სომხეთის მიერთება რომის სტატუტთან, რომელიც სტაბილურობის კუთხით მნიშვნელოვან ფაქტორად მიგვაჩნია; სომხეთში მიმდინარე სამხედრო რეფორმები. ეს ყველაფერი გარკვეული სტაბილურობის ფაქტორებია, და ჩვენ ამას ერთობლივად ვითვალისწინებთ“, - „არმენპრესის“ ცნობით, განაცხადა გრიგორიანმა და დასძინა, რომ შეფასებები სწორედ ამ ყველაფრის ფარგლებში კეთდება.
აზერბაიჯანის პრეზიდენტმა ილჰამ ალიევმა 8 იანვარს აზერბაიჯანულ ტელევიზიებს მიცემულ ინტერვიუში სომხეთის მიმართ მორიგი მუქარები გამოთქვა. მან სომხეთის მიმართ მორიგი ცრუ ბრალდებები წამოაყენა და განაცხადა, რომ „სომხეთი ფაშისტური სახელმწიფოა და ამ ფაშიზმს ან სომხეთის ხელმძღვანელობა გაანადგურებს, ან ამას აზერბაიჯანი გააკეთებს“. ალიევმა კვლავ გაიმეორა ე.წ. „ზანგეზურის კორიდორის“ ცრუ ნარატივი და განაცხადა, რომ ეს კორიდორი აუცილებლად გაიხსნება.
