საქართველო არ მიიღებს მონაწილეობას „3+3“ რეგიონალური საკონსულტაციო პლატფორმის შეხვედრაში

ერევანი, 16 ოქტომბერი, არმენპრესი. ქართული მხარე არ იქნება წარმოდგენილი 18 ოქტომბერს სტამბოლში სამხრეთ კავკასიის „3+3“ პლატფორმის ფარგლებში დაგეგმილ მოლაპარაკებებზე. „არმენპრესის“ ცნობით, ამის შესახებ TASS-ს საქართველოს საგარეო საქმეთა სამინისტროს პრესსამსახურიდან აცნობეს.

„არა, ჩვენ მონაწილეობას არ მივიღებთ. საქართველომ დიდი ხანია განაცხადა, რომ არ იღებს მონაწილეობას აღნიშნულ ფორმატში“, - განაცხადა საქართველოს საგარეო საქმეთა სამინისტროს პრესსამსახურის თანამშრომელმა.

მანამდე, სომხეთის საგარეო საქმეთა სამინისტროს პრესსპიკერმა ანი ბადალიანმა განაცხადა, რომ საგარეო საქმეთა მინისტრი არარატ მირზოიანი მონაწილეობას მიიღებს „3+3“ რეგიონალური საკონსულტაციო პლატფორმის მესამე შეხვედრაში.

„3+3“ საკონსულტაციო პლატფორმის პირველი შეხვედრა გაიმართა 2021 წლის დეკემბერში. იმ დროს შეხვედრაში მონაწილეობდნენ სომხეთის, აზერბაიჯანის, რუსეთის, ირანისა და თურქეთის საგარეო საქმეთა მინისტრის მოადგილეები. საქართველომ უარი თქვა შეხვედრაში მონაწილეობაზე. პლატფორმის მეორე შეხვედრა ჩატარდა 2023 წლის ოქტომბერში. შეხვედრა ირანის დედაქალაქ თეირანში, საგარეო საქმეთა მინისტრების დონეზე გაიმართა. საქართველომ არც მეორე შეხვედრაში მიიღო მონაწილეობა.