სომხეთში ჩატარდა საველე სწავლებები აშშ-ის თავდაცვის დეპარტამენტის საფრთხეების შემცირების სააგენტოსთან ერთად

ერევანი, 4 ოქტომბერი, არმენპრესი. მასობრივი განადგურების იარაღის წინააღმდეგ ბრძოლის ფარგლებში, სომხეთის რესპუბლიკის სახელმწიფო მმართველობის სისტემის შესაბამისი ორგანოების მონაწილეობით, სომხეთში ჩატარდა საველე სწავლება. სწავლებები განხორციელდა აშშ-ის თავდაცვის დეპარტამენტის საფრთხეების შემცირების სააგენტოსთან ერთად და სომხეთის უსაფრთხოების საბჭოს ოფისის კოორდინაციით.

როგორც „არმენპრესი“ სომხეთის უსაფრთხოების საბჭოს ოფისის მიერ გავრცელებული განცხადებიდან იუწყება, სწავლებების მიზანი იყო ქიმიური, ბიოლოგიური, რადიაციული და ბირთვული (CBRN) საფრთხეების გავრცელების წინააღმდეგ სომხეთის შესაძლებლობებისა და რეაგირების მექანიზმების გადახედვა. ეს იყო უპრეცედენტო სწავლება სომხეთისთვის როგორც მონაწილე სტრუქტურების რაოდენობით, ასევე გეოგრაფიული არეალით.

სწავლებაში ჩართული იყო CBRN მიმართულებით რეაგირებაზე პასუხისმგებელი სახელმწიფო მმართველობის სისტემის 10 ორგანო. გათამაშდა ექვსი განსხვავებული სცენარი, რომელიც მიზნად ისახავდა CBRN ფაქტორებით გამოწვეული საგანგებო სიტუაციების პრევენციასა და რეაგირების შესაძლებლობების შეფასებას. ზოგიერთი სცენარი რეალურ პირობებში ჩატარდა, ხოლო დანარჩენები სიმულაციური ხასიათის იყო.

სწავლების საფუძველზე ჩატარებული ანალიზი შესაძლებლობას მისცემს CBRN ინციდენტებზე რეაგირებასთან დაკავშირებული არსებული მდგომარეობის სრულფასოვან შეფასებას, ძლიერი და სუსტი მხარეების გამოვლენას, და საბოლოო მიზანი იქნება CBRN ინციდენტებზე სომხეთის რეაგირების შესაძლებლობების გაძლიერება.