Հայաստանում հայտնաբերվել է ԱՄՆ-ում անչափահասի նկատմամբ սեռական հանցագործություն կատարած միջազգային հետախուզվող

Քրեական ոստիկանները հայտնաբերել են ԱՄՆ-ում անչափահասի նկատմամբ անառակաբարո գործողություններ կատարած միջազգային հետախուզվողին։ Քրեական ոստիկանության գլխավոր վարչությունում ստացվել էր օպերատիվ տեղեկություն, որ Միացյալ Նահանգներում անչափահասի նկատմամբ անառակաբարո գործողություններ կատարած տղամարդը թաքնվում է Հայաստանում: «Արմենպրես»-ի փոխանցմամբ՝ այս մասին հաղորդագրություն է տարածել ՀՀ ՆԳ նախարարությունը։

ԱՄՆ քաղաքացու նկատմամբ հետախուզում էր հայտարարված դեռևս 2024 թվականին Տեխաս նահանգի քրեական օրենսգրքի մի շարք հոդվածներով հանցագործություն կատարելու մեղադրանքով: Այս տարվա օգոստոսի 5-ին ԱՄՆ իրավապահների կողմից տղամարդու նկատմամբ հայտարարվել էր արդեն միջազգային հետախուզում: Հայաստանի ՆԳՆ Քրեական ոստիկանության ծառայողները, ակտիվ համագործակցելով ԱՄՆ դեսպանության տարածաշրջանային անվտանգության ծառայության հետ, ձեռնամուխ են եղել հետախուզվողին հայտնաբերելու գործին: 

Պարզվել է հետախուզվողի թաքնվելու վերջին վայրը, և որոնողական աշխատանքներին ներգրավվել են նաև Քրեական ոստիկանության Շիրակի մարզային վարչության ծառայողները: Նոյեմբերի 5-ին Գյումրի քաղաքի Սունդուկյան փողոցի տներից մեկում հետախուզվողը հայտնաբերվել է և ձերբակալվել: Նրա հայտնաբերման մասին տեղյակ է պահվել Ինտերպոլին և Դատախազությանը։