2 րոպեի ընթերցում
ԵՐԵՎԱՆ, 29ՆՈՅԵՄԲԵՐԻ, ԱՐՄԵՆՊՐԵՍ: ՀՀ կրթության, գիտության, մշակույթի և սպորտի նախարարի տեղակալ Արա Խզմալյանը նոյեմբերի 29-ին լրագրողների հետ հանդիպմանն ասաց, որ աստիճանաբար ավելի են ազատականացնում մշակութային ոլորտը:
«Պետական վերահսկողությունը, անհարկի միջամտություններն ազատ ստեղծագործական գործընթացներին, վարչական լծակների կիրառումը տնօրենների և ոլորտի պատասխանատուների վրա այլևս գոյություն չունեն: Մենք հայտարարում ենք, որ ստեղծագործական դաշտը պետք է լինի ազատ, և ստեղծագործողի աշխատանքին մենք չպետք է միջամտենք»,-«Արմենպրես»-ի հաղորդմամբ՝ շեշտեց նա:
Անդրադառնալով մշակութային հեղափոխությանը` Խզմալյանն ասաց, որ մշակութային հեղափոխություն ասելով հասկանում է նոր ձևաչափերի, գեղարվեստական նոր լեզվի, հանդիսատեսի հետ հարաբերվելու նոր եղանակների բացահայտումը:
Նրա խոսքով` հեղափոխական է համարում այն ալիքը, որը սկիզբ է առել մշակութային կրթության ոլորտում: Փոխնախարարը հիշեցրեց «Դաս Ա», «Դասարան+դասական» ծրագրերի մասին: «Կոչ ենք անում հանրությանն ուշադրություն դարձնել այս կրթական ծրագրերին, որովհետև մենք գնալու ենք էմոցիոնալ կրթության ճանապարհով: Դասական երաժշտությունը, դասական արժեքները, դասական պոեզիան էմոցիոնալ և տպավորիչ գեղարվեստական ձևերով մեր դպրոցականներին ներկայացնելն առաջնահերթություն է: Եթե ուզում ենք վաղը մշակութային շուկա ունենալ, պետք է այսօրվանից սկսենք»,ընդգծեց Արա Խզմալյանը: