2 րոպեի ընթերցում
ՍՊԻՏԱԿ, 26 ՍԵՊՏԵՄԲԵՐԻ, ԱՐՄԵՆՊՐԵՍ: Սպիտակի տարածաշրջանում Մ3 ճանապարհի՝ անձրևի պայմաններում հիմնանորոգված հատվածը կապալառու ընկերությունը քանդել է ու նորից ասֆալտապատել:
«Արմենպրես»-ի հաղորդմամբ՝ այս մասին միջպետական նշանակության ճանապարհների հիմնանորոգման և միջին նորոգման աշխատանքներին հետևելու նպատակով շրջայցին լրագրողների հետ զրույցում ասաց ՀՀ տարածքային կառավարման և ինքնակառավարման փոխնախարար Բագրատ Բադալյանը:
«Աշխատանքները կատարվել էին անձրևի պայմաններում: Շինարարը մոտ 100 մետր հատված քանդել ու աշխատանքը նորից է կատարել»,-ասաց Բադալյանը:
«Հայավտոճան» ընկերությունը վերահսկում է ճանապարհների հիմնանորոգման աշխատանքների որակը:
«Մենք ասֆալտը ոչ խտացված վիճակում վերցնում, լաբորատորիայում փորձարկում ենք, տեսնում ենք մեր տված ասֆալտին համապատասխանում է, թե ոչ: Եթե համապատասխանում է, թույլատրում ենք տեղադրել, տեղադրելուց հետո ճանապարհից վերցնում ենք փորձանմուշներ,ստուգում ենք, թե արդյոք հաստությունը, խտացումը համապատասխանո՞ւմ են: Ըստ այդմ որոշում ենք՝ ճանապարհի ասֆալտը համապատասխանո՞ւմ է նորմերին, թե ոչ»,-ասաց «Հայավտոճան»-ի տնօրեն Գոռ Ավետիսյանն ու հավելեց, որ ստուգում են լիովին նոր սարքավորումներով, արդյունքը պարզ է դառնում 2-3 օրվա ընթացքում:
Պահանջներին համապատասխանության դեպքում է միայն կապալառու ընկերությունը ստանում գումարի մի մասը: