Մխիթարյանը նորամուտի խաղում գոլ խփեց, իսկ «Ռոմա»-ն հաղթեց

ԵՐԵՎԱՆ, 15 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանի ֆուտբոլի ազգային թիմի ավագ Հենրիխ Մխիթարյանն «Ռոմա»-ի կազմում իր նորամուտի խաղում դարձավ գոլի հեղինակ՝ միաժամանակ դառնալով առաջին հայաստանցի ֆուտբոլիստը, ով աչքի է ընկել Սերիա Ա-ում:

«Արմենպրես»-ի հաղորդմամբ՝ Իտալիայի ֆուտբոլի առաջնության 3-րդ տուրի շրջանակներում «Ռոմա»-ն սեփական հարկի տակ հյուրընկալել էր «Սասուոլո»-ին: Առաջին խաղակեսում «Ռոմա»-ն ակնհայտ առաջատարի դերում էր և հասցրեց 4 գնդակ ուղարկել մրցակցի դարպասը:

Հայաստանի ազգային ընտրանու անդամ Հենրիխ Մխիթարյանը 22-րդ րոպեին խփեց մայրաքաղաքայինների 3-րդ գնդակը: Հայ կիսապաշտպանը մասնակցեց «Ռոմա»-ի ամբողջ խաղին:

Երկրորդ կեսում «Սասուոլո»-ին հաջողվեց միայն կրճատել հաշվի տարբերությունը: Ի վերջո, «Ռոմա»-ն հաղթեց 4:2 հաշվով:

Այս տուրից հետո «գայլերը» մրցաշարային աղյուսակում 7-րդն են:

«Ռոմա»-ն հաջորդ հանդիպումը կանցկացնի Եվրոպայի լիգայի շրջանակում՝ մրցելով «Իստանբուլ Բաշակզեհիր»-ի հետ: Այդ խաղը կկայանա սեպտեմբերի 19-ին: