Արտգործնախարարն ԱԺ պատգամավորներին ներկայացրեց ՀՀ արտաքին քաղաքականության 3 հիմնարար սկզբունքները
2 րոպեի ընթերցում
ԵՐԵՎԱՆ, 29 ՕԳՈՍՏՈՍԻ, ԱՐՄԵՆՊՐԵՍ: ՀՀ արտաքին գործերի նախարար Զոհրաբ Մնացականյանը Ազգային ժողովի պատգամավորներին ներկայացրեց Հայաստանի Հանրապետության արտաքին քաղաքականության երեք հիմնարար սկզբունքները:
«Արմենպրես»-ի փոխանցմամբ՝ օգոստոսի 29-ին ԱԺ պատգամավորների հետ հանդիպումը կազմակերպված է ՀՀ ԱԳՆ կենտրոնական ապարատի և օտարերկրյա պետություններում ՀՀ դիվանագիտական ծառայության մարմինների ղեկավարների ամենամյա համաժողովի շրջանակներում:
«Համաժողովն անցկացվում է «Արժեքները գործողության մեջ. Հայաստանի դիվանագիտությունը փոփոխվող աշխարհում» խորագրի ներքո: Մենք առանձնացրել են արժեքների երեք հարթություններ, որոնց վրա հիմնվում է մեր արտաքին քաղաքականությունը: Դրանք են՝ քաղաքակրթական արժեքները, մեր պատմական ժառանգությունը և ժամանակակից ժողովրդավարության ու մարդու իրավունքների արժեքները, որոնք մեր ժողովուրդը պաշտպանեց և նոր որակ հաղորդեց թավշյա հեղափոխության և դրան հաջորդած խորհրդարանական ընտրությունների ժամանակ: Այս համաժողովի ընթացքում մենք հստակ ամրագրեցինք ՀՀ արտաքին քաղաքականության երեք հիմնարար սկզբունքները, որոնց կիրառմամբ մենք պետք է միջազգային ասպարեզում հետապնդենք Հայաստանի և հայ ժողովրդի արժեքներն ու շահերը: Այդ սկզբունքներն են՝ ինքնիշխանություն, համահայկականություն և փոխգործակցություն»,- ասաց Մնացականյանը:
Նախարարը նշեց, որ իրենց համար առավել քան կարևոր է միջոցառման շրջանակներում Հայաստանի ժողովրդի ընտրյալ ներկայացուցիչների՝ Ազգային ժողովի պատգամավորների հետ բաց և անկաշկանդ քննարկումը բոլորին հուզող հարցերի շուրջ: Զոհրաբ Մնացականյանը կարևորեց նաև խորհրդարանական բոլոր ձևաչափերով համագործակցություններն ու փոխգործակցությունները: