Զուրաբիշվիլին հորդորել Է ԵՄ-ին՝ նոր անդամների ընդունման ոչ ստանդարտ քայլեր ձեռնարկել

ԵՐԵՎԱՆ, 23 ՕԳՈՍՏՈՍԻ, ԱՐՄԵՆՊՐԵՍ: Վրաստանը գտնում Է, որ ներկա պայմաններում, երբ Եվրամիությունն զբաղված Է ներքին խնդիրների լուծմամբ, ինչի պատճառով ընդլայնման եւ հանրակցության մեջ նոր անդամների ընդունման գործընթացի հետ բարդություններ են ծագում, հարկավոր Է օգտվել ոչ ստանդարտ գործիքներից: Այդ մասին, ինչպես հայտնել Է «Գրուզիա Online»-ը՝ հղում անելով ՏԱՍՍ-ին, Վրաստանի նախագահ Սալոմե Զուրաբիշվիլին օգոստոսի 22-ին հայտարարել Է Լիտվայի մայրաքաղաք Վիլնյուսում միջազգային քաղաքականության հարցերին նվիրված խորհրդաժողովում, տեղեկացնում Է «Արմենպրես»-ը:

«Քանի որ ԵՄ-ի ընդլայնման ուղիղ ճանապարհը ժամանակավորապես արգելափակված Է այն բանի պատճառով, որ Եվրոպան զբաղված Է ներքին խնդիրների լուծմամբ, հարկավոր Է պլանավորել ոչ ստանդարտ միջոցներ եւ պատրաստ լինել նոր մեթոդների ու համարձակ քայլերի»,-ասել Է նա:

Նախագահի խոսքով՝ Վրաստանը, մինչեւ ԵՄ-ին անդամակցելու թեկնածուի կարգավիճակ ստանալը, պատրաստ Է բանակցություններ վարել հանրակցությանը անդամակցելու համար անհրաժեշտ համապատասխանության բաժինների շուրջ: «Պետք Է օգտվել ցանկացած հնարավորությունից, այդ թվում՝ նրանցից, որոնք չկան դասագրքերում: Օրինակ՝ կարելի Է բանակցություններ վարել առանց ԵՄ-ին անդամակցելու թեկնածուի պաշտոնական կարգավիճակի: Դա թույլ կտա Վրաստանին մոտենալու նրան, ինչն իրապես գործում Է Եվրոպայում»,-նշել Է նա: Զուրաբիշվիլիի խոսքով՝ Թբիլիսին պատրաստ Է նման բանակցություններ վարել այն բաժինների շուրջ, որոնք վերաբերում են մշակույթին, կրթությանը, սոցիալական ապահովությանը, տրանսպորտին, տնտեսության առանձին հատվածների: