Իրանն Իրաքին առաջարկել Է վերականգնել մինչեւ Սիրիայի նավահանգիստ ձգվող նավթամուղը

ԵՐԵՎԱՆ, 21 ՕԳՈՍՏՈՍԻ, ԱՐՄԵՆՊՐԵՍ: Իրանի իշխանություններն Իրաքին առաջարկել են այն նավթամուղի աշխատանքի վերականգնման նախագիծ, որն Իրաքի տարածքով ձգվում Է դեպի Սիրիայի Բանյաս նավահանգիստ Միջերկրական ծովի ափին՝ Հորմուզի նեղուցում աճող սպառնալիքների լույսով, սակայն պաշտոնական Բաղդադն առայժմ չի պատասխանել առաջարկին: Այդ մասին, ինչպես տեղեկացնում Է «Արմենպրես»-ը, հայտնել Է Իրաքի al-Sumaria հեռուստաալիքը՝ վկայակոչելով իրազեկ աղբյուր:

«Թեհրանը վերստին արծարծել Է այն խողովակաշարով նավթի արտահանման նախագծի թեման, որն անցնում Է Իրաքի տարածքով եւ հասնում Սիրիայի Բանյաս նավահանգիստ՝ Միջերկրական ծովի ափին: Այդ կերպ հնարավոր կլինի խուսափել ամերիկյան պատժամիջոցներից եւ գործի չդնել Հորմուզի նեղուցը, քանի որ ավելի ու ավելի շատ են դրա փակման հետ կապված երկյուղները Իրանի հետ ԱՄՆ-ի եւ նրա դաշնակիցների ռազմական ընդհարման դեպքում»,- ալիքին հայտարարել Է աղբյուրը:

Աղբյուրը նշել Է, որ առաջարկվում Է երկու տարբերակ. կա՛մ 1000 կիլոմետր երկարությամբ նոր նավթամուղի կառուցում, որի կեսը կանցնի Իրաքով, կա՛մ իրանական կողմի հաշվին Քիրքուկ - Բանյաս նավթամուղի նորոգում, որը չի գործում 1982 թվականից: Այդ նավթամուղով կարող Է փոխադրվել օրական մինչեւ 1,25 միլիոն բարել նավթ, նշել Է աղբյուրը, հաղորդել Է ՌԻԱ Նովոստին: