Հայաստանում ներդրումներ անելու ցանկություն են հայտնել Ղազախստանի հայ համայնքի ներկայացուցիչները
2 րոպեի ընթերցում
ԵՐԵՎԱՆ, 4 ՀՈՒՆԻՍԻ, ԱՐՄԵՆՊՐԵՍ: Ղազախստանի Հանրապետության հայկական համայնքի ներկայացուցիչները ՀՀ Ազգային ժողովի հայ-ղազախական բարեկամական խմբի անդամներին հայտնել են Հայաստանում ներդրումներ անելու ցանկության մասին: «Արմենպրես»-ի փոխանցմամբ՝ հունիսի 4-ին տեղի ունեցած մամուլի ասուլիսի ընթացքում այս մասին ասաց բարեկամական խմբի անդամ, «Բարգավաճ Հայաստան» խմբակցության անդամ Միքայել Մելքումյանը:
«Մենք հանդիպեցինք նաև հայ համայնքի ներկայացուցիչների հետ, այնտեղ կային շատ հաջողված ձեռնարկատերեր, որոնք ուզում են Հայաստանում որոշակի ներդրումներ կատարել, և այս առումով մենք պետք է ապահովենք այդ ներդրումները կատարելու պայմանները»,- ասաց Մելքումյանը:
«Արմենպրես»-ի հարցին ի պատասխան, Մելքումյանը նշեց, որ ներդրումները նախատեսվում են ճանապարհաշինության և շինարարության ոլորտներում:
«Ում հետ, որ հանդիպել ենք, խոսել են ճանապարհաշինական ոլորտի և ընդհանրապես շինանյութերի արտադրության վերաբերյալ, որովհետև այդ մարդիկ Ղազախստանում զբաղված են այդ բիզնեսով, ուղղակի ուզում են հայրենիքում ևս ներդրումներ կատարել: Առաջիկայում ես նախաձեռնում եմ օրենքի նախագիծ, որով պետք է կարողանանք ոչ միայն արտաքին ներդրողների, այլև մեր երկրում գտնվող համաքաղաքացիների համար, ովքեր ներկայացնում են ներդրումային ծրագրեր, ունենանք մեկ պատուհանի օրենքով ամրագրված աջակցության կոնկրետ ինստիտուտ, որը ներդրումների ներգրավման համար կսահմանի իրավունք և պատասխանատվություն այդ ներդրումների ճակատագրի նկատմամբ»,- նշեց Միքայել Մելքումյանը:
ԱԺ Հայ-ղազախական բարեկամական խումբը Ղազախստանի մայրաքաղաք Նուր-Սուլթան է այցելել մայիսի 21-24-ը:
