ԱԺ-ն առաջին ընթերցմամբ ընդունեց բնակլիմայական աղետների հետևանքով բերքի կեսի վնասվելու պարագայում հողի հարկից ազատելու նախագիծը

ԵՐԵՎԱՆ, 4 ՀՈՒՆԻՍԻ, ԱՐՄԵՆՊՐԵՍ: ՀՀ ազգային ժողովն առաջին ընթերցմամբ ընդունեց «Բարգավաճ Հայաստան» խմբակցության կողմից առաջարկված Հարկային օրենսգրքում լրացում կատարելու մասին օրենքի նախագիծը: «Արմենպրես»-ի հաղորդմամբ՝ նախագիծը ստացավ 59 կողմ, 18 դեմ ձայներ, ձեռնպահ էր քվեարկել 5 պատգամավոր:

Նախագծով նախատեսվում է, որ գյուղատնտեսական նշանակության հողերը, տնամերձ եւ այգեգործական հողամասերը բնակլիմայական աղետների հետեւանքով (կարկուտ, երաշտ, ցրտահարություն եւ այլն) մշակաբույսերի, պտղատու այգիների առնվազն 50 տոկոս վնասվելու դեպքում տվյալ տարում ազատվելու են հողի հարկից: