Ալեն Սիմոնյանը վերահաստատեց՝ Հայաստանում չի մնալու սուպերվարչապետի քննադատված ինստիտուտը

ԵՐԵՎԱՆ, 7 ՄԱՅԻՍԻ, ԱՐՄԵՆՊՐԵՍ: ՀՀ Ազգային ժողովի փոխխոսնակ, «Իմ քայլը» խմբակցության անդամ Ալեն Սիմոնյանն Ազգային ժողովում վերահաստատեց ՀՀ վարչապետ Նիկոլ Փաշինյանի այն միտքը, որ Հայաստանում չի մնալու սուպերվարչապետի քննադատված ինստիտուտը: «Արմենպրես»-ի փոխանցմամբ` այս մասին Սիմոնյանն ասաց մայիսի 7-ին Ազգային ժողովում նախագծերի փաթեթի երկրորդ ընթերցմամբ քննարկման ընթացքում, արձագանքելով «Լուսավոր Հայաստան» խմբակցության անդամ Անի Սամսոնյանի այն դիտարկմանը, թե Նիկոլ Փաշինյանը նախքան վարչապետ ընտրվելը բազմիցս քննադատել է ներկայիս սուպերվարչապետական համակարգը:

«Այդ օրենքը փոխվելու է, սուպերվարչապետի ինստիտուտն այն տեսքով, որի մասին խոսվել է, չի մնալու: Այդ մասին խոսել է նաև վարչապետը: «Իմ քայլը» խմբակցությունը կողմ է քվեարկելու կառավարության կողմից բերված այս օրենսդրական նախաձեռնությանը»,- ասաց Սիմոնյանը:

Նախագծի ամբողջական ընդունման դեպքում նոր կառավարությունը կունենա հետևյալ նախարարությունները.

Արտաքին գործերի նախարարություն

Պաշտպանության նախարարություն

Արտակարգ իրավիճակների նախարարություն

Արդարադատության նախարարություն

Աշխատանքի և սոցիալական հարցերի նախարարություն

Կրթության, գիտության և մշակույթի նախարարություն

Բնապահպանության նախարարություն

Առողջապահության նախարարություն

Ֆինանսների նախարարություն

Էկոնոմիկայի նախարարություն

Տարածքային կառավարման և ենթակառուցվածքների նախարարություն

Բարձր տեխնոլոգիական արդյունաբերության նախարարություն:

Կառավարության նիստերը կլինեն դռնբաց՝ բացառությամբ վարչապետի պատճառաբանված որոշմամբ նիստը կամ դրա մի մասը դռնփակ անցկացնելու դեպքերի:

ՀՀ վարչապետ Նիկոլ Փաշինյանը փետրվարի 8-ին հայտարարել էր, որ Սփյուռքի նախարարության փոխարեն այսուհետ կստեղծվի Սփյուռքի գործերի գլխավոր հանձնակատարի պաշտոն վարչապետի աշխատակազմում: Հանձնակատարը կլինի վարչապետի ներկայացուցիչը Սփյուռքի հետ հարաբերություններում և վարչապետի անունից կհամակարգի կառավարության աշխատանքները սփյուռքի հետ հարաբերություններում:

ԱԺ-ում «Կառավարության կառուցվածքի և գործունեության մասին» ՀՀ օրենքում փոփոխություններ և լրացումներ կատարելու մասին օրենքի նախագծի և կից ներկայացված նախագծերի փաթեթի առաջին ընթերցմանը դեմ էին քվեարկել «Բարգավաճ Հայաստան» և «Լուսավոր Հայաստան» խմբակցությունները:

Երկրորդ ընթերցման ընթացքում ևս «Բարգավաճ Հայաստան» և «Լուսավոր Հայաստան» խմբակցությունները հայտարարեցին, որ դեմ են քվեարկելու օրենքի նախագծին: