ԵՐԵՎԱՆ, 29 ԱՊՐԻԼԻ, ԱՐՄԵՆՊՐԵՍ: Հայաստանի Հանրապետության Քրեակատարողական հիմնարկներում նախորդ տարիների համեմատ նվազել է հացադուլի դիմող դատապարտյալների թիվը: «Արմենպրես»-ի փոխանցմամբ` այս մասին ապրիլի 29-ին հրավիրված մամուլի ասուլիսի ընթացքում ասաց ՀՀ արդարադատության նախարար Արտակ Զեյնալյանը:
«Այս պահի դրությամբ մենք Քրեակատարողական հիմնարկներում ունենք 5 հացադուլավոր: Սա նախկին տարիների համեմատ ցածր ցուցանիշ է»,- ասաց Զեյնալյանը:
Արդարադատության նախարարը նշեց, որ հացադուլի բոլոր դեպքերը քրեական գործի դեմ են:
«Որևէ բողոք չկա Քրեակատարողական հիմնարկների պահման պայմաններից: Իմ պաշտոնավարման ընթացքում չեմ հիշում դեպք, որ դատապարտյալը հացադուլի դիմած լինի քրեակատարողական հիմնարկի պայմանների դեմ, բոլորն առնչվում են քրեական գործին»,- նշեց Արտակ Զեյնալյանը: