1 րոպեի ընթերցում
ԵՐԵՎԱՆ, 24 ԱՊՐԻԼԻ, ԱՐՄԵՆՊՐԵՍ: Հայ մեծանուն կոմպոզիտոր Տիգրան Մանսուրյանը Հայոց ցեղասպանության 104-րդ տարելիցին մեծ ողբերգության զոհերի հիշատակը հարգեց Ծիծեռնակաբերդի հուշահամալիրում ծաղիկներ խոնարհելով: «Արմենպրես»-ի հաղորդմամբ՝ լրագրողների հետ զրույցում պատմեց իր ընտանիքի պատմությունը:
«Մայրս մի քանի ամսական է եղել, երբ հայտնվել է որբանոցում՝ ճանապարհին կորցնելով քրոջը, իսկ հորը Մարաշում մարաքի մեջ այլ տղամարդկանց հետ այրել են թուրքերը: Մորս եղբայրն է փրկվել, իսկ նրա մայրը հասել է Հալեպ, այնտեղ է մահացել: Մեր տան պատմությունն է սա: Հայրս նույն ճանապարհն է անցել: Մայրս, որ Լենինգրադյան փողոցում էր ապրում, հաճախ թոռներից մեկնումեկի ձեռքը բռնած, սովորական օրերին մի վարդի փունջ ձեռքին գալիս էր Ծիծեռնակաբերդ, իր համար դա իր ծնողների գերեզմանն էր: Ես շարունակում եմ նույնը»,-պատմեց Մանսուրյանը:
Մեծանուն կոմպոզիտորը շեշտեց, որ պետք է դիմադրել մինչ մի օր թուրք բառը մեզ համար ածական բառ լինելուց դառնա գոյական: Մանսուրյանը նշեց, որ կարևոր է ոչ միայն ֆիզիկական ուժը, այլ կարողության, խելքի, ինտելեկտի, բարության ուժը, հավատարմության ուժը՝ անցյալի արժեքների, սրբությունների, հայոց լեզվի նկատմամբ: