2 րոպեի ընթերցում
ԵՐԵՎԱՆ, 6 ՄԱՐՏԻ, ԱՐՄԵՆՊՐԵՍ: Լոս Անջելեսում ապրիլի 24-ին կանցկացվի Արդարության երթ՝ նվիրված Հայոց ցեղասպանության զոհերի հիշատակին: «Արմենպրես»-ի հաղորդմամբ, ակցիան տեղի է ունենալու Լոս Անջելեսում Թուրքիայի հյուպատոսության հարևանությամբ:
Շարունակելով ավելի քան չորս տասնամյակի ավանդույթը՝ կապված երթի կազմակերպման հետ, Հայոց ցեղասպանության կոմիտեն կոչ է անում ակտիվորեն մասնակցել ակցիային:
Հայոց ցեղասպանության կոմիտեն լայն կոալիցիա է՝ բաղկացած Կալիֆորնիայում հայկական կրոնական, քաղաքական, երիտասարդական, սոցիալական 21 կազմակերպություններից:
Օսմանյան կայսրությունում Առաջին համաշխարհային պատերազմի տարիներին իրագործված Հայոց ցեղասպանությունն իրագործվեց երիտթուրքական կառավարության կողմից Օսմանյան կայսրության տարբեր շրջաններում: Միջազգային առաջին արձագանքն այս իրադարձություններին 1915թ. մայիսի 24-ի Ֆրանսիայի, Ռուսաստանի և Մեծ Բրիտանիայի համատեղ հայտարարությունն էր, որտեղ հայ ժողովրդի նկատմամբ կատարված բռնությունները բնորոշվեցին որպես «հանցագործություն մարդկության և քաղաքակրթության դեմ»: Կողմերը կատարված հանցագործության համար պատասխանատու էին համարում թուրքական կառավարությանը:Թերևս Հայոց ցեղասպանությունը ծրագրավորված էր դեռ 1911-12 թթ., սակայն երիտթուրքերը որպես հարմար առիթ օգտագործեցին Առաջին համաշխարհային պատերազմի սկիզբը` այն իրագործելու համար:
Ամեն տարի ապրիլի 24-ին Հայաստանում և աշխարհի տարբեր երկրներում կազմակերպվում են հիշատակի միջոցառումներ, պահանջատիրական ակցիաներ: