Լևոն Տեր-Պետրոսյանը ծավալուն հոդվածով անդրադարձել է վարչապետ Նիկոլ Փաշինյանի հետ իր հարաբերություններին

ԵՐԵՎԱՆ, 23 ՓԵՏՐՎԱՐԻ, ԱՐՄԵՆՊՐԵՍ: Հայաստանի Հանրապետության առաջին նախագահ Լևոն Տեր-Պետրոսյանը ծավալուն հոդված է հրապարակել ilur.am կայքում՝ անդրադառնալով իր և վարչապետ Նիկոլ Փաշինյանի հարաբերություններին ու այս համատեքստում վերջին շրջանում տարբեր շրջանակների կողմից հնչեցվող պնդումներին:

«Ի՞նչ պատճառով է, արդ, որ խախտելով իմ սովորությունը, այս անգամ որոշել եմ դրանց անդրադառնալ անձամբ։ Հավաստիացնում եմ՝ ո՛չ ամենեւին ինքնապաշտպանության, այլ բացառապես Նիկոլ Փաշինյանին շինծու մեղադրանքների թիրախ չդարձնելու նկատառումով»,- «Արմենպրես»-ի փոխանցմամբ՝ նշել է Տեր-Պետրոսյանը:

Անդրադառնալով պնդումներին, թե ՀՀ վարչապետն իր «քաղաքական հոգեզավակն է», իսկ նա՝ Փաշինյանի «կնքահայրը»՝ ՀՀ առաջին նախագահը դա կատարյալ անհեթեթություն է անվանել: Մեջբերելով որոշ հատվածների կողմից առաջ տարվող միտքն այն մասին, թե իբր «Փաշինյանն ամեն երեկո զանգահարում է իրեն և խորհուրդներ հարցնում»՝ Լևոն Տեր-Պետրոսյանն ընդգծել է. «Նախ հիշեցնեմ, որ 2012թ. հետո ես Փաշինյանին հանդիպել եմ ընդամենը մեկ անգամ, 2018 թվականի հուլիսի 16-ին, ինչի մասին ՀՀ կառավարության մամլո ծառայությունը հանդես է եկել պաշտոնական հաղորդագրությամբ։ Դրանից հետո վարչապետի հետ ես որևէ հեռախոսազրույց կամ միջնորդների միջոցով որեւէ շփում չեմ ունեցել… եթե ոմանց կարծիքով Փաշինյանին հնարավոր է ուղղորդել խորհուրդներով կամ նրան ինչ-որ բան թելադրել, նրանք կամ չարաչար սխալվում են, կամ ընդհանրապես այդ մարդուն չեն ճանաչում, կամ էլ նրա մասին դատում են սեփական հակումներով։ Ես Փաշինյանից ավելի անկախ և ինքնաբավ մարդու չեմ հանդիպել»:

ՀՀ առաջին նախագահն անդրադարձել է նաև վերջերս շահարկվող, այսպես կոչված, «տարածքներ խաղաղության դիմաց» թեզին՝ շեշտելով. «Միանգամից նշեմ, որ ո՛չ ես, ո՛չ Փաշինյանը երբևէ «տարածքներ խաղաղության դիմաց» բանաձևը չենք օգտագործել։ Դա բացարձակ հերյուրանք է, մոգոնված չարակամների ու ձեռնածուների կողմից։ Ինչ վերաբերում է ղարաբաղյան կարգավորման ծրագրին, ապա, ի տարբերություն ՀՀ երեք նախագահների, Փաշինյանի ծրագիրը դեռեւս հայտնի չէ։ Նա առայժմ բավարարվել է միայն խնդրի վերաբերյալ որոշ սկզբունքների, մասնավորապես, Ղարաբաղի անունից բանակցելու քոչարյանա-սարգսյանական դիրքորոշումից հրաժարվելու և ԼՂՀ-ի՝ որպես լիիրավ հակամարտող կողմի երբեմնի կարգավիճակը վերականգնելու անհրաժեշտության շեշտադրմամբ։ Անհրաժեշտ է ավելացնել նաև, որ ղարաբաղյան կարգավորման վերաբերյալ ինչպիսի ծրագրով էլ Փաշինյանը հանդես գա, դա լինելու է իր սեփական ծրագիրը, ինչպես եղել է թե՛ իմ, թե՛ Քոչարյանի, և թե՛ Սարգսյանի պարագայում։ Հայաստանի յուրաքանչյուր առաջնորդ պատասխանատու է ի՛ր ծրագրի համար, որքան էլ այն ընդհանրություններ ունենա նախորդների ծրագրերի հետ»:

Լևոն Տեր-Պետրոսյանը վերահաստատել է նախկինում ասած միտքն այն մասին, որ «Հայ ազգային կոնգրեսն» ամեն ինչով պատրաստ է աջակցելու ՀՀ նոր իշխանությունների՝ մեր երկրի բարգավաճմանը և զարգացմանը միտված բոլոր ջանքերին։

Առավել մանրամասն սկզբնաղբյուր կայքում