Ատոմ Ջանջուղազյանը հարկային համակարգի փոփոխություների կարևոր բաղադրիչ է համարում հասարակության եկամուտների ավելի արդյունավետ բաշխումը
3 րոպեի ընթերցում
ԵՐԵՎԱՆ, 2 ՆՈՅԵՄԲԵՐԻ, ԱՐՄԵՆՊՐԵՍ: Հարկային համակարգի առաջարկվող փոփոխությունների կարևոր բաղադրիչներ են ներդրումային գրավչության բարձրացումը, հասարակության եկամուտների արդյունավետ բաշխումը և հարկաբյուջետային կայունության ամրապնդումը:
«Արմենպրես»-ի հաղորդմամբ`2019 թ. պետական բյուջեի նախագծի քննարկումների ընթացքում ԱԺ-ում այս մասին ասաց ՀՀ ֆինանսների նախարարի պաշտոնակատար Ատոմ Ջանջուղազյանը:
«Հարկային օրենսգիրքը կազմելիս նպատակ է դրվել ունենալ կայուն և կանխատեսելի հարկային համակարգ, որը ներդրումների տեսակետից գրավիչ կդարձնի Հայաստանում բիզնեսով զբաղվելը: Հետևաբար, մենք փորձել էինք ախտորոշել խնդիրները և հասկանալ, թե ինչ լրացուցիչ փոփոխությունների կարիք կա: Փորձ ենք արել գնահատել, թե ինչպիսին է պատկերը ներդրումների և արտահանման տեսակետից հարկային համակարգի փոխազդեցությամբ պայմանավորված: Հասկացել ենք, որ միտումը չի բխում մեր տեսլականից, շահութաբերությունն ավելի բարձր է ոչ թե արտահանելի ճյուղում, այլ՝ ոչ արտահանելի ճյուղում: Դա նշանակում է, որ մեր նպատակն է ունենալ արտահանման աճ, դրա արդյունքում տնտեսական աճ: Մենք պետք է դա ունենանք որպես նպատակ: Պետք է ջանք գործադրենք, որ գոնե հարկային համակարգը հակախթան չհանդիսանա արտահանելի ճյուղում նոր ներդրումների»,-ասաց Ջանջուղազյանն ու կարևորեց երկրի ներդրումային գրավչության բարձրացումը, ինչը կխթանի նաև տնտեսական ակտիվության աճին:
Նրա կարծիքով՝ հարկային համակարգի մեկ այլ առանձնահատկությունը եկամտային անհավասարությունն է: Ջանջուղազյանը նկատեց, որ չափազանց քիչ է այն բնակչության թիվը, որն ունի մեծ հարստություն, մեծ է այն խումբը, որն ունի ցածր եկամուտ: «Սա նշանակում է, որ բաշխման տեսակետից անելիքներ ունենք: Իսկ հարկային համակարգն այն համակարգերից է, որի գործառույթը դրա ապահովումն է: Այդ ախտորոշումը կանխորոշում է այն նպատակադրումները, որոնք դրել են հարկային համակարգի փոփոխությունների առաջ»,-նշեց նա ու հավելեց՝ հարկային համակարգը պետք է ծառայեցնել հասարակության եկամուտների ավելի արդյունավետ վերաբաշխմանը:
Ջանջուղազյանը կարևորեց նաև հարկաբյուջետային կայունության ամրապնդումը: