Փաշինյանն անդրադարձավ աշխատավարձերը չբարձրացնելու վերաբերյալ պատգամավորների մտահոգություններին

ԵՐԵՎԱՆ, 1 ՆՈՅԵՄԲԵՐԻ, ԱՐՄԵՆՊՐԵՍ: Հայաստանի Հանրապետության վարչապետի պաշտոնակատար Նիկոլ Փաշինյանն անդրադարձավ պատգամավորների կողմից հնչեցրած մտահոգությանը, թե 2019թ. պետական բյուջեի նախագծով աշխատավարձերի բարձրացում նախատեսված չէ: Ինչպես հաղորդում է «Արմենպրես»-ը, ՀՀ վարչապետի ընտրության հարցի քննարկման ժամանակ ունեցած եզրափակիչ ելույթում ՀՀ վարչապետի պաշտոնակատարն ընդգծեց, որ երբ ասում են, որ եկամտային հարկը 36.6 տոկոսի, 28 տոկոսի փոխարեն լինելու է 23 տոկոս, դա աշխատավարձի բարձրացում է: «Էլ չեմ ասում, որ մենք արդեն իսկ կուտակային կենսաթոշակի համակարգի փոփոխության արդյունքում 206 հազար մարդու աշխատավարձ դեռ հուլիսի 1-ից բարձրացրել ենք»,- մանրամասնեց նա:

Անդրադառնալով պետական համակարգի, բյուջետային համակարգի աշխատողների դրույքների բարձրացման վերաբերյալ հնչած մտահոգություններին՝ Փաշինյանն ընդգծեց, որ այդ մտահոգությունները տեղին են, մասնավորապես, ուսուցիչների պետական ծառայության աշխատակիցների և գիտնականների մասով:

«Եկեք խորանանք խնդիրների մեջ: Հայաստանի հանրակրթության ոլորտում 48 795 դրույք կա: Այսինքն, մեր պահանջարկն այդքան է: Բայց այսօր այնտեղ աշխատում է 10 782-ով ավել մարդ, քան նախատեսված է այդ հաստիքացանկով: Ինչպե՞ս է ստացվել այս իրավիճակը: Տարբեր հանգամանքների բերումով: Եվ այսօր մենք նույնիսկ չենք կարող ասել, որ մեր բոլոր ուսուցիչները ստանում են այնքան աշխատավարձ, որ նախատեսված է օրենքով: Նրանք ավելի ցածր աշխատավարձ են ստանում: Որովհետև շատ դեպքերում այն տեղերում, որ պետք է լինի մի ուսուցիչ, մի ուսուցչի աշխատավարձը ստանում է երկու ուսուցիչ»,-մանրամասնեց Փաշինյանը:

Պետական կառավարման համակարգում այսօր 18 հազար 700 մարդ է աշխատում: Մենք մտածում ենք, որ սա արդյունավետ պետական կառավարման համակարգ է՞: Եթե սա արդյունավետ պետական կառավարման համակարգ է, ես ամենապարզից սկսեմ՝ քաղաքացիները իրենց նամակների պատասխանները նույնիսկ ժամանակին չեն կարողանում ստանալ: Մենք ի՞նչ ենք ուզում ասել: Մենք ուզում ենք ֆորմալ ասել, որ աշխատավարձերը բարձրացրինք, բայց իրականում աշխատավարձը չբարձրանա, որակն ընկնի և ոչ մի հարց չլուծե՞նք: Մենք այսօր այս խնդրի պատճառով չենք կարող հարցին շատ արագ արձագանքել»,- ընդգծեց նա:

ՀՀ վարչապետի պաշտոնակատարը հավելեց, որ իրենք ընտրություն ունեին՝ բոլոր թոշակառուների թոշակը հազար դրամով բարձրացնել կամ աղքատության գծից ներքև գտնվող 85 հազար թոշակառուների և նպաստառուների նպաստը բարձրացնել, որ գոնե համոզված լինեն, որ այդ մարդիկ հաց գնելու գումար ունեն: «Մենք երկրորդ ճանապարհն ընտրեցինք՝ չբացառելով խոսակցությունը մյուս ճանապարհի մասին: Բայց մեր գլոբալ խնդիրն այն է, որ մի երկրում, որտեղ 400 հազար մարդ աշխատում է, իսկ 800 հազար մարդ այդ աշխատանքի արդյունքը պետք է կիսի, չենք կարող շատ լուրջ խոսել: Մենք պետք է աշխատողների թիվն ավելացնենք, դրա համար եմ ասում, որ մենք պետք է աշխատանքը խրախուսենք»,- ասաց Փաշինյանը:

Խոսելով գիտնականների վարձատրության մասին՝ վարչապետի պաշտոնակատարը նախ նշեց, որ Հայաստանում հաստիքով կա 4 հազար 500 գիտնական: «Բյուջետային խորհրդակցությունների շրջանակներում քննարկումներ են եղել, երբ ես ասել եմ, խնդրում եմ ինձ ասեք՝ ի՞նչ գիտական արդյունք են տալիս 4 հազար 500 գիտնականները: Ես չեմ ասում, որ նրանք արդյունք չեն տալիս, բայց մենք չգիտենք, թե այդ գիտնականներին ի՞նչ պատվեր ենք տալիս, նրանք ինչպե՞ս են վերադարձնում այդ պատվերը: Մենք չգիտենք՝ գիտության մեջ կեղծ հաստիքների խնդիր ունե՞նք, թե՞ չունենք: Սոցիալական նպաստների ոլորտում մենք ասում ենք 360 հազար նպաստառու անձ ունենք: Բայց մենք բացահայտումներ ենք անում, որ հազարավոր մարդիկ կան, ովքեր չգիտեն, որ իրենք նպաստառու են, իսկ փարոսի տնօրենները, քաղաքապետերը նրանց փողերը ստանում են, յուրացնում են»,- մանրամասնեց ՀՀ վարչապետի պաշտոնակատարը:

Նիկոլ Փաշինյանի խոսքով՝ Հայաստանում գիտության հիմնական խնդիրն այն է, որ մեր իրականությունն ու գիտությունը միմյանցից կտրված են, գիտությունը և տնտեսությունը իրար հետ կապ չունեն: «Երբ մենք կստեղծենք այդ կապը, մեր գիտնականները ոչ թե պետության աշխատավարձի հույսին կլինեն, այլ մեր գիտնականները շատ կոնկրետ գործառույթային պայմանագրերով ծանրաբեռնված կլինեն, որ զարգացող արդյունաբերությունը նրանց կոնկրետ պատվեր տա»,- ասաց Փաշինյանը: