398.84
Ռուբեն Ռուբինյանը հանդիպել է ԱՄՆ և ԵՄ դիվանագետների, քաղաքական փորձագետների և լրագրողների հետ
2 րոպեի ընթերցում
ԵՐԵՎԱՆ, 26 ՍԵՊՏԵՄԲԵՐԻ, ԱՐՄԵՆՊՐԵՍ: Սեպտեմբերի 26-ին ՀՀ արտաքին գործերի նախարարի տեղակալ Ռուբեն Ռուբինյանն ընդունել է Գերմանական Մարշալ հիմնադրամի և Եվրասիա համագործակցություն հիմնադրամի (ԵՀՀ) կողմից կազմակերպված՝ ԱՄՆ և ԵՄ դիվանագետների, քաղաքական փորձագետների և լրագրողների պատվիրակությանը, որը ճանաչողական այցով ժամանել է Հայաստան: Ինչպես «Արմենպրես»-ին տեղեկացրին ՀՀ ԱԳՆ լրատվության և հանրային դիվանագիտության վարչությունից, հանդիպմանը ներկա էր ՀՀ արտաքին գործերի նախարարության մամուլի խոսնակ Տիգրան Բալայանը:
Ողջունելով պատվիրակության անդամներին՝ նախարարի տեղակալ Ռուբինյանը ներկայացրել է Հայաստանի արտաքին քաղաքական առաջնահերթություններն ու հիմնական ուղղությունները, անդրադարձել նոր կառավարության զարգացման բարեփոխումների օրակարգին։ ԵՄ հետ համագործակցության համատեքստում նախարարի տեղակալն ընդգծել է Հայաստանի դերը տարածաշրջանում որպես ժողովրդավարության և մարդու իրավունքների արժեքների կրողի:
Փոխնախարարը ներկայացրել է Լեռնային Ղարաբաղի հակամարտության կարգավորման գործընթացի շուրջ Հայաստանի մոտեցումները, հիմնահարցի բացառապես խաղաղ կարգավորման ուղղությամբ գործադրվող ջանքերը:
Հանդիպմանը նախարարի տեղակալ Ռուբեն Ռուբինյանը և արտաքին գործերի նախարարության մամուլի խոսնակ Տիգրան Բալայանը պատասխանել են պատվիրակության անդամների հարցերին:
Բաժանորդագրվեք մեր ալիքին Telegram-ում