ԱԳ փոխնախարարը Ֆրանսիայի նախագահի խորհրդականի հետ քննարկել է երեք ոլորտներում հայ-ֆրանսիական համագործակցության օրակարգը
1 րոպեի ընթերցում
ԵՐԵՎԱՆ, 27 ՀՈՒԼԻՍԻ, ԱՐՄԵՆՊՐԵՍ: ՀՀ ԱԳ նախարարի տեղակալ Կարեն Նազարյանը հուլիսի 27-ին ընդունել է Ֆրանսիայի նախագահի խորհրդական Ժան-Մարկ Բերթոնին։ Հանդիպմանը մասնակցել է նաև Հայաստանում Ֆրանսիայի դեսպան Ժոնաթան Լաքոթը։
Ինչպես «Արմենպրես»-ին տեղեկացրին ՀՀ արտաքին գործերի նախարարության լրատվության և հանրային դիվանագիտության վարչությունից, հանդիպմանն անդրադարձ է կատարվել Բրյուսելում ավելի վաղ տեղի ունեցած Փաշինյան-Մակրոն հանդիպմանը, հոկտեմբերին Երևանում կայանալիք Ֆրանկոֆոնիայի գագաթաժողովի նախապատրաստական աշխատանքներին, ինչպես նաև Ֆրանսիայի նախագահի՝ Հայաստան կատարելիք պետական այցի հետ կապված հարցերին։
Զրուցակիցները գոհունակությամբ արձանագրել են քաղաքական ու տնտեսական բնագավառներում առկա բովանդակային միջպետական երկխոսության ընթացքը և քննարկել կրթական, գիտական և մշակութային ոլորտներում հայ-ֆրանսիական համագործակցության օրակարգը: