«ՔԵՆԴԼ» սինքրոտրոնային հետազոտությունների ինստիտուտը տարածաշրջանի համար կարևոր նշանակություն ունի
2 րոպեի ընթերցում
![«ՔԵՆԴԼ» սինքրոտրոնային հետազոտությունների ինստիտուտը տարածաշրջանի համար կարևոր նշանակություն ունի](http://armenpress.am/resized/480/static/news/b/2018/07/941161.jpg)
ԵՐԵՎԱՆ, 18 ՀՈՒԼԻՍԻ, ԱՐՄԵՆՊՐԵՍ: «ՔԵՆԴԼ» սինքրոտրոնային հետազոտությունների ինստիտուտը ոչ միայն Հայաստանի, այլև տարածաշրջանի համար շատ կարևոր նշանակություն ունի:
«Արմենպրես»-ի հաղորդմամբ՝ ՀՀ կրթության և գիտության նախարարության գիտության պետական կոմիտեի նախագահ Սամվել Հարությունյանը ինստիտուտում կազմակերպված բաց դռների օրվա շրջանակում լրագրողների հետ ունեցած ճեպազրույցում ասաց, որ կառույցում կարելի է համաշխարհային մակարդակ ունեցող գիտական հետազոտություններ կատարել աշխարհի տարբեր երկրներից բերված տարբեր սարքավորումների միջոցով: «Այս կառույցից կարող են օգտվել բազմաթիվ հիմնարկներ՝ ինչպես ակադեմիական, այնպես էլ ճյուղային ինստիտուտներ: Նախատեսվում է հուշագիր ստորագրել գերմանական կրթական կենտրոններից մեկի հետ, որի համաձայն կենտրոնի ինստիտուտում կրթական կրեդիտներ կարող են ստանալ նաև արտասահմանցի ուսանողները: Մոտ ժամանակներս նմանատիպ հուշագիր կստորագրվի նաև Իտալիայի հետ»,-հավելեց նա:
Հարությունյանի խոսքով՝ ինստիտուտի բյուջեն մոտ 280 միլիոն դրամ է: «Կառույցի կայացման մեջ շատ մեծ ներդրում են ունեցել գերմանական DESY և Շվեյցարիայի ազգային արագացուցչային կենտրոնները: Կենտրոնում սարքավորումների զգալի մասը նվիրատվությունների տեսքով է ձեռք բերվել»,-հավելեց նա:
ՀՀ ԿԳՆ գիտության կոմիտեն «Քենդլ» սինքրոտրոնային հետազոտությունների ինստիտուտի հետ համատեղ կազմակերպում է բաց դռների օր: Առաջին անգամ հանրության բոլոր շերտերի համար բաց են լինելու «Քենդլ» ինստիտուտի ռադիոֆիզիկայի, լազերային տեխնիկայի, մագնիսական չափումների, գերբարձր վակուումային տեխնիկայի, դիֆուզիոն եռակցման և զոդման, նորագույն նյութերի և միկրոսարքերի, փորձարարական կենսաբանության հետազոտական լաբորատորիաները: Այցելուները կծանոթանան ինստիտուտի ստեղծման պատմությանը, ընթացիկ հետազոտական աշխատանքներին, ԱՐԵԱԼ արագացուցչային համալիրի զարգացման և միջազգային համագործակցության հեռանկարներին: