Արմեն Սարգսյանն անդրադարձել է ՀՀ նախագահի մրցանակի «Գրականություն» անվանակարգի հանձնաժողովի աշխատանքի վերաբերյալ դժգոհություններին
2 րոպեի ընթերցում
ԵՐԵՎԱՆ, 24 ՄԱՅԻՍԻ, ԱՐՄԵՆՊՐԵՍ: ՀՀ նախագահ Արմեն Սարգսյանը տեղյակ է նախագահի մրցանակի «Գրականություն» անվանակարգի հանձնաժողովի աշխատանքի վերաբերյալ դժգոհություններից: ՀՀ նախագահի մրցանակի հանձնման հանդիսավոր արարողությունից հետո լրագրողների հետ զրույցում ՀՀ նախագահ Արմեն Սարգսյանը նշեց, որ ինքը զբաղվել է այդ հարցով:
«Ես տեղյակ եմ, չգիտեմ նախկինում նախագահներն ինչպես են վարվել, բայց ես միջամտեցի՝ առաջարկելով, որ խորհուրդը հանդիպի դիմողների հետ, և եթե լուծում չտրվի, ապա այս պահին մրցանակը չի տրվի: Կարծում եմ՝ լուծումը գտնվեց, որն ինձ թույլ տվեց այդ մրցանակը ստորագրել: Ես կարծում եմ, որ եթե որևէ մեկը որևէ առիթով ունի բողոքներ, ապա պետք է իրեն ազատ զգա իր մտքերն արտահայտելու առումով: Բայց միշտ հիշեք, որ ցանկացած բողոք և առաջարկ պետք է հիմնավորված, տրամաբանված լինի, մի կողմ պետք է թողնել զգացմունքները»,- «Արմենպրես»-ի հաղորդմամբ ասաց Արմեն Սարգսյանը:
Մայիսի 4-ին գրականության ոլորտի մասնագետները բաց նամակ էին ուղղել ՀՀ նախագահին՝ իրենց դժգոհությունը հայտնելով ՀՀ նախագահի մրցանակի հանձնաժողովների աշխատանքի վերաբերյալ: Նշված էր, որ առանձին հանձնաժողովների նախագահներ գործարքների մեջ են մտնում հեղինակների հետ, նախնական պայմանավորվածությամբ հրավիրում մրցույթի և նրանց օգտին որոշում կայացնում: