1 րոպեի ընթերցում
ԵՐԵՎԱՆ, 1 ՄԱՐՏԻ, ԱՐՄԵՆՊՐԵՍ: Լիբանանում ՀՀ դեսպան Սամվել Մկրտչյանը փետրվարի 26-ին մասնակցել է Ազգային թանգարանում կազմակերպված մամուլի ասուլիսին, որը նվիրված էր Լիբանանում Ֆրանկոֆոնիայի ամսվա (մարտ) շրջանակներում կազմակերպվելիք միջոցառումներին։ Այս մասին «Արմենպրես»-ին տեղեկացրին ՀՀ արտաքին գործերի նախարարության մամուլի, տեղեկատվության և հասարակայնության հետ կապի վարչությունից՝ հավելելով. «Մամուլի ասուլիսին, որը նախագահում էր Լիբանանի մշակույթի նախարար Ղաթթաս Խուրին, մասնակցում էին նաև Ֆրանսիայի, Բելգիայի, Շվեյցարիայի, Կանադայի, Ռումինիայի և Ուրուգվայի դեսպանները, որոնք ներկայացրին Ֆրանկոֆոնիայի շաբաթվա ընթացքում իրենց կողմից նախաձեռնված միջոցառումները:
Իր խոսքում ՀՀ դեսպան Սամվել Մկրտչյանը տեղեկացրեց 2018թ. հոկտեմբերին Երևանում կայանալիք Ֆրանկոֆոնիայի միջազգային կազմակերպության գագաթնաժողովի և Հայաստանում անցկացվելիք այլ միջոցառումների վերաբերյալ: Դեսպանն անդրադարձավ նաև Ֆրանկոֆոնիայի ամսվա շրջանակներում Լիբանանում ՀՀ դեսպանության և ՀԲԸՄ համագործակցությամբ կազմակերպվելիք միջոցառումներին: