Ադրբեջանի զինվորական դատախազությունը բացահայտված «լրտեսական» խմբի գործն ուղարկել է դատարան 

ԵՐԵՎԱՆ, 27 ՓԵՏՐՎԱՐԻ, ԱՐՄԵՆՊՐԵՍ: Ադրբեջանի գլխավոր դատախազությունը «լրտեսություն իրականացնելու» մեջ մեղադրվող անձանց մի մասի գործերն ուղարկել է դատարան:

Այս մասին, ինչպես հաղորդում է «Արմենպրես»-ը, հայտնում է ադրբեջանական azadliq.info լրատվական գործակալությունը:

«Այդ անձինք ծառայել են տարբեր զորամասերում և լրտեսական գործունեություն են ծավալել: Լրտեսական խմբի որոշ անդամների վերաբերյալ հետաքննությունը դեռ շարունակվում է: Հուսով ենք, որ մինչև Նովրուզի տոնը կվերջացնենք բոլոր գործերն ու կուղարկենք դատարան»,-նշվում է զինվորական դատախազության հայտարարության մեջ:

2017 թ. մայիսի 7-ին Ադրբեջանի գլխավոր դատախազությունը, Պաշտպանության նախարարությունը, Ներքին գործերի նախարարությունն ու Պետական անվտանգության ծառայությունը հայտնել էին, որմի խումբ զինվորականներ և քաղաքացիական անձինք մեղադրվում են հայկական հետախուզական ծառայության հետ համագործակցելու մեջ:

Այս գործով ձերբակալվել էր ընդհանուր առմամբ 9 անձ: Ադրբեջանական լրատվամիջոցներում տեղ գտած տեղեկությունների համաձայն` այս 9 անձանցից ոչ ոք ներկայումս կենդանի չէ և նրանց նկատմամբ իրականացվել են արտադատարանական մահապատիժներ: