Աֆղան Մուխտարլին բանտից Ադրբեջանի ընդդիմադիրներին կոչ է արել ուշադիր հսկել ընտրությունների ընթացքը

ԵՐԵՎԱՆ, 14 ՓԵՏՐՎԱՐԻ, ԱՐՄԵՆՊՐԵՍ: Ադրբեջանցի հետաքննող լրագրող Աֆղան Մուխտարլին, ով հայտնի է ալիևյան ռեժիմի խախտումները վեր հանելու և քննադատելու գործունեությամբ, բանտից երկրի ընդդիմադիրներին կոչ է արել ուշադիր հսկել ապրիլի 11-ի նախագահական ընտրությունների ընթացքը:

Այս մասին, ինչպես հաղորդում է «Արմենպրես»-ը, հայտնում է ադրբեջանական azadliq.info լրատվական գործակալությունը:

«Ընդդիմադիր Ժողովրդական ճակատ, «Մուսավաթ» կուսակցությունները, «Նիդա» և ՌԵԱԼ քաղաքացիական շարժումները թող բոյկոտային բլոկ ստեղծեն, կազմակերպեն ընտրությունների դիտարկումը: Թող ստեղծեն շտաբ և ընտրատեղամասերում ուշադիր հսկեն ընտրությունների ընթացքը»,-նշել է Մուխտարլին:

Լրագրող Աֆղան Մուխթարլին հայտնի է որպես ադրբեջանական իշխանությունների վարած քաղաքականության քննադատ: 2015 թվականից ի վեր նա ստիպված է եղել բնակություն հաստատել Թբիլիսիում: 2017 թվականի մայիսի 29-ին լրագրողն անհետացել էր: Ավելի ուշ նա կապ էր հաստատել իր փաստաբան Էլչին Սադիգովի հետ՝ տեղեկացնելով վերջինիս, որ իրեն տեղափոխել են Բաքու: Լրագրողին առաջադրվել էր մեղադրանք՝ սահմանն ապօրինի հատելու կապակցությամբ: Աֆղան Մուխտարլիի ձերբակալությունը որպես քաղաքական ձերբակալություն են բնութագրել բազմաթիվ միջազգային կազմակերպություններ և պահանջել ազատ արձակել լրագրողին, սակայն ալիևյան ռեժիմն ամեն գնով սաստում է խոսքի ազատությունը, հրաժարվում է հարգել մարդու իրավունքների վերաբերյալ միջազգային պարտավորություններն ու շարունակում է անօրինական ձերբակալությունները: