368.54
Թաներ Աքչամն այցելել է Թուրքիայի բանտից փախած պոլսահայ մտավորական Սևան Նիշանյանին
2 րոպեի ընթերցում
ԵՐԵՎԱՆ, 21 ԴԵԿՏԵՄԲԵՐԻ, ԱՐՄԵՆՊՐԵՍ: Հայոց ցեղասպանությունը ճանաչած թուրք հայտնի պատմաբան Թաներ Աքչամը այցելել է բանտից փախնելուց հետո Հունաստանում հանգրվանած պոլսահայ լեզվաբան Սևան Նիշանյանին: Ինչպես հաղորդում է «Արմենպրես»-ը, այս մասին նրանք գրառում են կատարել ֆեյսբուքյան իրենց էջերում:
Նիշանյանը հրապարակել է Սամոս կղզում իր և Աքչամի լուսանկարը՝ թողնելով հետևյալ գրառումը. «Բանտից փախչողները: Թաներ Աքչամի հետ քննարկում ենք կղզու աշխարհաքաղաքական վիճակը»:
Նա տեղեկացրել է, որ մինչև Նոր տարի Աքչամը մնալու է իր հետ:
Սամոս գնալու մասին գրառում է կատարել նաև Աքչամը՝ նշելով՝ մեծապես հավատացած է, որ լեզվաբանի հետ այդ տարածաշրջանի աշխարհաքաղաքական իրադրության քննարկման արդյունքները բարենպաստ կլինեն մարդկության ապագայի համար:
Այն բանից հետո, ինչ Թուրքիայի մեջլիսի հայ պատգամավոր Գարո Փայլանը հայտարարություն արեց Թուրքիայից հեռացած և Եվրոպայում հաստատված հայերի, ինչպես նաև Էրդողանի ընդդիմադիրների դեմ մահափորձ ձեռնարկելու մասին՝ Նշանյանը մեկ այլ գրառում է թողել: «Թուրքիայի Հանրապետության կողմից մարդասպանների թիմեր ուղարկելու մասին իմանալուն պես Թաներ Աքչամի հետ որոշում կայացրեցինք բարձրանալ լեռները»,- հեգնանքով գրել է նա՝ հրապարակելով լեռներում Աքչամի լուսանկարները: Դրանցից մեկում նա առաջարկել է փորձել գտնել պատմաբանին՝ չնայած կամուֆլյաժին:
«Սևանի հետ որոշել ենք բացահայտել մեր սահմանները»,- այս մասին գրել է Աքչամը՝ տարածելով լուսանկարները:
Բաժանորդագրվեք մեր ալիքին Telegram-ում