Ավտովթարի հետևանքով վիրավորված վարորդի եւ ուղեւորի վիճակը բուժհաստատություններում գնահատվել է բավարար

ԳԱՎԱՌ, 27 ՆՈՅԵՄԲԵՐԻ, ԱՐՄԵՆՊՐԵՍ: Գեղարքունիքի մարզում, Մ-10 ավտոճանապարհի Սեւան-Գավառ հատվածի 14-րդ կիլոմետրում նոյեմբերի 26-ի ժամը 22-ի սահմաններում գրանցվել է ճանապարհատրանսպորտային պատահար, ինչի հետեւանքով իրար բախված ավտոմեքենաներից մեկի վարորդը եւ ուղեւորը տեղում զոհվել են, իսկ մյուսի վարորդը եւ ուղեւորը՝ հոսպիտալացվել:

Ինչպես «Արմենպրես»-ը տեղեկացավ ՀՀ ԱԻՆ փրկարար ծառայության Գեղարքունիքի մարզային վարչությունից, տեղում զոհվել են «Մերսեդես» մակնիշի ավտոմեքենայի վարորդը եւ ուղեւորը, իսկ «Նիսսան» ավտոմեքենայի վարորդը եւ ուղեւորը բուժօգնության տեղափոխվել Գավառի եւ Սեւանի բժշկական կենտրոններ:

Գավառի ԲԿ տնօրեն Աշոտ Կարապետյանի տեղեկացմամբ՝ իրենց մոտ նոյեմբերի 26-ի ուշ երեկոյան բուժօգնության է տեղափոխվել Երեւան քաղաքի բնակիչ, «Նիսսան» ավտոմեքենայի վարորդ Արմեն Կիրակոսյանը: «Նրա վիճակը բավարար էր, կյանքին սպառնացող բան չկար, նրան ցուցաբերվել է անհրաժեշտ բուժօգնություն, եւ նոյեմբերի 27-ի առավոտյան նա դուրս է գրվել հիվանդանոցից բավարար առողջական վիճակով»,-ներկայացրեց Աշոտ Կարապետյանը: «Մեզ մոտ բուժօգնության է տեղափոխվել Կարեն Մամիկոնյանը: Նրան ցուցաբերվել է անհրաժեշտ բուժօգնություն, սակայն հետագա բուժումը շարունակելու համար որոշվել է վիրավորին տեղափոխել մայրաքաղաք, ինչը եւ արվել է նոյեմբերի 27-ի գիշերվա ընթացքում: Վիրավորի վիճակը բավարար էր»,-պատմեց Սեւանի ԲԿ տնօրեն Գայանե Էլիզբարյանը:

Խոսրով Խլղաթյան