2 րոպեի ընթերցում
ԵՐԵՎԱՆ, 1 ՆՈՅԵՄԲԵՐԻ, ԱՐՄԵՆՊՐԵՍ: Հայաստանի Հանրապետության նախագահի ինստիտուտի փոփոխություններով պայմանավորված՝ 2018թ. պետական բյուջեով նախագահի աշխատակազմին հատկացվելիք գումարը նվազել է: Ազգային ժողովում ՀՀ 2018թ. պետական բյուջեի նախագծի քննարկմանն այս մասին հայտնեց ՀՀ ֆինանսների նախարարի առաջին տեղակալ Ատոմ Ջանջուղազյանը: «Հայաստանի Հանրապետության նախագահի աշխատակազմի համար կօգտագործվի 2 միլիարդ 445 միլիոն դրամ, որից 2 միլիարդ 395 միլիոն դրամը աշխատակազմի պահպանման համար նախատեսված ծախսերն են: Կցանկանայի նշել, որ նախագահի ինստիտուտի փոփոխությունների գործոնով պայմանավորված այս ցուցանիշը զիջում է 2017թ. համար հաստատված ցուցանիշին»,- «Արմենպրես»-ի հաղորդմամբ՝ ընդգծեց Ջանջուղազյանը:
Նա հավելելով, որ ինստիտուտի վերջնականացման գործընթացը շարունակվում է, և արդեն ունեն նոր հայտ նախագահի աշխատակազմից, ըստ որի՝ նախատեսվում է, որ նախատեսված գումարը ևս 64 միլիոն դրամով նվազեցնել: «Եթե ընթացքում անհրաժեշտություն կլինի այլ վերանայումների, դրանք իրենց արտացոլումը կգտնեն կամ բյուջեի նախագծի լրամշակված տարբերակում, որը կներկայացվի Ազգային ժողովի քննարկմանը կամ կառավարությունը իր լիազորությունների շրջանակներում այդ փոփոխությունները կկատարի»,- նշեց Ջանջուղազյանը:
2017թ. ՀՀ պետական բյուջեով ՀՀ նախագահի աշխատակազմին հատկացվել է 4 միլիարդ 522 միլիոն դրամ: