Ջերմուկում ավարտված շախմատի «Գրան պրի»-ում հաղթեց Կիրիլ Շևչենկոն 

ԵՐԵՎԱՆ, 16 ՀՈԿՏԵՄԲԵՐԻ, ԱՐՄԵՆՊՐԵՍ: Ջերմուկում ընթացող շախմատի Եվրոպայի պատանիների «Գրան պրի»-ն ավարտվեց, որի հաղթող դարձավ Կիրիլ Շևչենկոն:

«Արմենպրես»-ի հաղորդմամբ` Ջերմուկում կայացած պատանիների «Գրան Պրի»-ի վերջին տուրում Շևչենկոն կրկին հաղթանակ տարավ, այս անգամ՝ Մամիկոն Ղարիբյանի նկատմամբ: Շևչենկոն հաղթեց մրցաշարում՝ 11 հնարավորից հավաքելով 9 միավոր:

6-ական միավորով 2-3-րդ տեղերը կիսեցին Շանթ Սարգսյանը և Արամ Հակոբյանը:

Հայաստանի շախմատի ակադեմիան, Շախմատի եվրոպական միության հետ համագործակցությամբ և Կապանի լեռնահարստացման կոմբինատի հովանավորությամբ, հոկտեմբերի 3-16-ը Ջերմուկում անցկացրեց Եվրոպայի պատանեկան «Գրան պրի» մրցաշարի 2-րդ փուլը: Մրցաշարին մասնակցում էին շախմատում արդեն իսկ մեծ հաջողություններ գրանցած մինչև 16 տարեկան 12 պատանի շախմատիստներ արտերկրից և Հայաստանից: